Eigi að standa saman um fjár­festingu í jafn­rétti til náms

Á föstudag skrifaði háskóla-, iðnaðar- og nýsköpunarráðherra grein í Morgunblaðið þar sem hún gagnrýndi það að börn í einhverjum grunnskólum landsins fái ókeypis námsgögn frá sínu sveitarfélagi, það er blýanta, strokleður, stílabækur og svo framvegis.

Ræddi ráðherra að börn fengju ekki tilfinningu fyrir ábyrgð og umhyggju fyrir eignum sínum þegar þau fá gögnin ókeypis. Þá kosti ný ákvörðun um gjaldfrjálsar skólamáltíðir í grunnskólum skattgreiðendur milljarða á hverju ári.

„Og hef talað við fjölda kennara og ekki síst fengið enn þá fleiri skilaboð síðan ég skrifaði greinina um fólk sem upplifir það sama í kerfinu. Ég held að þetta sé almennt víðar og við þurfum bara að gæta þess hvernig við förum með fjármuni, tryggjum alltaf að styðja þá sem þurfa á því að halda en séum kannski ekki að verja fjármunum til efnameiri foreldra sem þyrftu ekki á þessum stuðningi að halda,“ segir Áslaug Arna Sigurbjörnsdóttir.

Komið til að vera

Námsgögn voru gerð gjaldfrjáls í grunnskólum Reykjavíkurborgar í borgarstjóratíð Dags B. Eggertssonar. Hann telur að allir séu stoltir af þessari breytingu og um sé að ræða mjög mikilvægt jafnréttismál.

„Þetta sparaði foreldrum, sérstaklega með mörg börn, töluverð útgjöld og ekki síst bara heilmikið stress og umstang síðustu dagana fyrir skólann. Þannig að ég held að þetta sé sannarlega komið til að vera í Reykjavík og í sveitarfélögum um land allt af því að það fylgdu eiginlega öll sveitarfélög í kjölfarið á þessu.“

Ókeypis máltíðir kjarabót fyrir fjölskyldur

Skólamáltíðir í grunnskólum verða gerðar gjaldfrjálsar um allt land í haust. Breytingin er hluti af stuðningsaðgerðum stjórnvalda í tengslum við gerð nýjustu kjarasamninga.

„Ég held að það sé mjög stórt og mikilvægt skref og mikil kjarabót fyrir fjölskyldur. Það er mjög mikilvægt að verkalýðshreyfingin náði þessu fram í samstarfi við ríkið og sveitarstjórnir um land allt og mun skipta mjög miklu máli. Það er auðvelt að gleyma því að það eru ekki nema rúm tuttugu ár síðan það komu skólamálatíðir í skólana og það líka var mikið jöfnunarmál,“ sagði Dagur í kvöldfréttum Stöðvar 2.

„Fyrir nokkrum árum keyptum við líka fartölvur og snjalltæki fyrir alla nemendur í unglingadeildum. Þannig við höfum verið að auka mjög mikið jafnræði og jöfnuð hvað margt sem lýtur að aðbúnaði barna í skólum í Reykjavík og líka víða um land.“

Dagur telur ekki sóun felast í því að styðja við efnameiri fjölskyldur með þessum hætti.

„Ef við erum að tryggja það að öll börn séu með námsgögn, að öll börn séu með góðan heilbrigðan skólamat og öll börn séu með tölvur til þess að undirbúa sig undir framtíðina þá erum við einfaldlega að standa rétt og vel að. Það má ræða sóun á ýmsan hátt en að fjárfesta í börnum, fjárfesta í menntun og jafnrétti til náms, það er eitthvað sem við eigum öll að standa saman um.“

Ætla að gera námsgögn barna í framhaldsskólum gjaldfrjáls

Í Sprengisandi á Bylgjunni í morgun svaraði Ásmundur Einar Daðason barnamálaráðherra Áslaugu og sagði ókeypis skólamáltíðir og námsgögn hluta af gæðamenntun barna. Þá ætli ríkið að ganga enn lengra.

„Við erum að vinna með tölur eins og tvö- og þreföldun námsgagnaútgáfu á næsta ári miðað við árið í ár. Við erum að vinna með það að ætla okkur að gera námsgögn fyrir átján ára og yngri í framhaldsskólum gjaldfrjáls á nokkrum árum og stíga fyrsta skrefið á næsta ári í því sambandi.“