Samgöngusáttmálinn taki á mikilli innviðaskuld við höfuð­borgar­svæðið

Samgöngusáttmáli ríkisins við sveitarfélögin á höfuðborgarsvæðinu nær yfir fjölmörg stór verkefni, eins og Sundabrú eða göng, Fossvogsbrú, Miklubraut í stokk eða göng og fleira og svo auðvitað borgarlínu. Sáttmálinn hefur verið í uppfærslu í um ár og hefur niðurstaðan verið kynnt fyrir þingflokkum og sveitarstjórnarmönnum. Svandís Svavarsdóttir innviðaráðherra segir að niðurstöður uppfærslu verði kynntar opinberlega á morgun.

„Við erum auðvitað í mjög langri skuld við höfuðborgarsvæðið. Ég held að þurfi ekki að útskýra það fyrir neinum að samgönguinnviðirnir í Reykjavík og á höfuðborgarsvæðinu öllu eru sprungnir fyrir löngu. Þannig að það er kominn tími til að bretta upp ermar í þessum efnum. Það auðvitað kostar en það er eðlilegt vegna þess að þetta skiptir máli. Þetta er í raun og veru æðakerfi samfélagsins hér á höfuðborgarsvæðinu,” segir Svandís.

Vilhjálmur Árnason þingmaður Sjálfstæðisflokksins hefur hins vegar gagnrýnt og fullyrt í Morgunblaðinu að kostnaður við sáttmálann hafi nánast tvöfaldast og Alþingi hljóti að þurfa að skoða þau mál. Innviðaráðherra segir fjárheimildir hafa verið tryggðar til félagsins Betri samgöngur sem Alþingi hafi sett á laggirnar á sínum tíma til að stjórna verkefninu.

„Síðan er þetta samspil við samgönguáætlun, fjárlagagerð og áætlanir þingsins á hverjum tíma. Við erum auðvitað með þingbundna ríkisstjórn þannig að þingið ræður á Íslandi. Það skiptir mjög miklu máli að eiga í þessum samskiptum við þingið. En ég treysti því og trúi fyrir okkur öll í þessu samfélagi sé þetta verðugt og mikilvægt næsta skref,” segir innviðaráðherra.

Greint verði frá röð framkvæmda á kynningarfundi á morgun. Samstaða væri milli stjórnarflokkanna og meðal sveitarfélaganna á höfuð borgarsvæðinu um verkefnið. Auðvitað væri mikilvægt að Alþingi væri vakandi þegar um væri að ræða svo stórar ákvarðanir.

Er rétt að kostnaður við sáttmálnn hafi tvöfaldast frá því í september í fyrra?

„Ég kannast ekki við þessar tölur sem eru á forsíðu Moggans í dag.“

Þannig að hann er ekki kominn í þrjúhundruð og eitthvað milljarða?

„Þær tölur eru á rökum reistar. En síðan (þarf að skoða) hvaða breytingar hafa átt sér stað, bæði hvað varðar umfang sáttmálans, þær aðgerðir sem farið er í, þær framkvæmdir sem þarna eru undir og svo framvegis. Þetta kemur allt saman í ljós á þessari kynningu á morgun,” segir Svandís Svavarsdóttir.