Lýstu sálar­kvöl og gráti finnska í­þrótta­fólksins í Ólympíu­þorpinu

Íþróttamennirnir sjálfir hafa nú skrifað nafnlaust bréf til að útskýra betur hvað var í raun vandamálið. Bréfið birtist í stórblaðinu Helsingin Sanomat.

„Það er enginn vafi á því að finnskir íþróttamenn stóðu sig ekki vel á Ólympíuleikunum í París. Við sáum nánast engan þeirra bæta sig og margir stóðu sig mun verr en þeir eru vanir. Það vantaði vissulega betra andrúmsloft í allt finnska Ólympíuhópinn,“ segir í bréfinu.

Í fyrsta sinn án verðlauna

56 íþróttamenn kepptu fyrir hönd Finnlands á Ólympíuleikunum í ár. Þetta er í fyrsta sinn í sögunni sem enginn Finni vinnur til verðlauna á Ólympíuleikum.

„Fyrir okkur sem voru í finnska Ólympíuliðinu og kepptum fyrir hönd þjóðar okkar í París þá kom þessi slaka frammistaða þó engum á óvart. Það sem hefur vantað í alla umfjöllun eftir leikana er sjónarhorn íþróttamannanna sjálfra,“ segir í bréfinu. Fjórir íþróttamenn standa að bréfinu en það er ekki gefið upp hverjir þeir eru.

Íþróttafólkinu leið illa

Fólkið sem var að vonast eftir verðlaunum náði ekki að standast þær væntingar var meðal annars skotmaðurinn Eetu Kallioinen (tólfta sæti), stangarstökkvarinn Wilma Murto (sjötta sæti) og spjótkastarinn Oliver Helander (tíunda sæti). Þau fóru öll tómhent heim.

Íþróttafólkið sem skrifar bréfið segir illa staðið af öllu varðandi afreksfólk í Finnlandi og að íþróttafólkið hafi komist til Parísar án hjálpar frá finnska Ólympíusambandinu.

Þeir nefna sérstaklega hversu illa var haldið utan um íþróttamennina í Ólympíuþorpinu og í kringum keppnir þeirra.

Stjórnmálamennirnir mikilvægari

„Fullt af íþróttamönnum leið illa vegna skorts á ástríðu og algjöru afskiptaleysi gagnvart afreksíþróttum og afreksíþróttafólki. Sumir voru svo einmana að þeir grétu af sálarkvöl í Ólympíuþorpinu,“ segir í þessu dramatíska bréfi.

Þeir halda því fram að það hafi skipt stjórnendur finnska hópsins meira að máli að taka á móti stjórnmálamönnum og styrktaraðilum heldur en að passa upp á íþróttafólkið.

Gamlir úreltir starfshættir

Meðal vandamála sem er nefnd í bréfinu er sú staðreynd að efnilegasta íþróttafólkið fær ekki nægan stuðning og hættir af þeim sökum allt of snemma. „Stærsta vandamálið í finnskum afreksíþróttum er að það er haldið áfram að vinna með gömlu úreltu starfshættina. Allir Finnar sem hafa náð árangri undanfarin ár hafa náð þessum árangri þrátt fyrir kerfið en ekki vegna þess,“ segir í bréfinu.

Þegar við skoðum árangur nágranna þeirra frá Norðurlöndum þá fengu Svíar ellefu verðlaun, Danir unnu til níu verðlauna og Norðmenn fengu átta. Finnland og Ísland voru því einu Norðurlandaþjóðirnar án verðlauna á leikunum í ár.''