Segja eldflaugaárás frá Íran væntan­lega

Þá hafa ráðamenn í Bandaríkjunum hringt viðvörunarbjöllum um að klerkastjórn Íran ætli sér að skjóta skotflaugum að Ísrael og það mögulega strax í dag. Talsmenn Hvíta hússins segja að slíkar árásir muni hafa miklar afleiðingar fyrir Íran.

Ætla að þurrka út Hezbollah í suðri

Yoav Gallant, varnarmálaráðherra Ísrael sagði í morgun að markmið hersins í sunnanverðu Líbanon væri að „þurrka út Hezbollah“ í landshlutanum. Þetta sagði hann þar sem hann var að skoða vopn og önnur hergögn sem ísraelskir sérsveitarmenn eru sagðir hafa fundið í áhlaupum yfir landamærin síðustu daga.

Ísraelskir hermenn gerðu svo innrás inn í Líbanon í gærkvöldi en enn sem komið er virðist sú innrás nokkuð afmörkuð, ef svo má kalla.

Sjá einnig: Árásir Ísraelsmanna í Líbanon héldu á­fram í nótt

Ísraelski herinn birti í morgun myndband af loftárásum og áhlaupum hermanna yfir landamærin í Líbanon. Þessar árásir eru sagðar hafa beinst gegn hernaðarinnviðum Hezbollah við landamærin og segjast Ísraelar hafa lagt hald á mikið magn vopna, annarra hergagna og upplýsinga í þessum áhlaupum.

Eitt þessara myndbanda sem ísraelski herinn birti í morgun og segir að eigi að sýna árás á hernaðarinnviði Hezbollah, var líklega tekið upp í febrúar. Í lýsingu með myndböndunum er tekið fram að þau hafi verið tekin frá því „stríðið hófst“.

Hezbollah-liðar hófu eldflaugaárásir sínar á Ísrael þann 8. október, eftir að Ísraelar hófu árásir á Gasaströndina. Um sextíu þúsund Ísraelar hafa þurft að flýja heimili sín vegna þessara árása og ráðamenn í Ísrael hafa heitið því að reka Hezbollah-liða á brott frá suðurhluta Líbanon til að koma í veg fyrir þessar árásir og gera fólkinu kleift að snúa aftur.

Það segja ráðamenn í Ísrael að sé þeirra helsta markmið. Yfirvöld í Líbanon segja að rúmlega þúsund manns hafi fallið í árásum Ísraela á undanförnum dögum.

Sjá einnig: Sér­sveitar­menn gera á­hlaup á Líbanon í undir­búningi inn­rásar

Talsmenn hersins segja að sérsveitarmenn hafi hingað til gert rúmlega sjötíu áhlaup inn í Líbanon á síðustu dögum. CNN hefur eftir ísraelskum embættismanni að ekki hafi komið til átaka milli hermanna og vígamanna Hezbollah.

Erfiðir dagar í vændum

Eins og áður segir hafa yfirvöld í Bandaríkjunum varað við væntanlegum eldflaugaárásum frá Íran og að skotflaugum geti mögulega verið skotið að Ísrael í dag. Blaðamaður Axios hefur eftir heimildarmanni sínum, sem á að þekkja til málsins, að búist sé við því að umfang árásarinnar frá Íran verði sambærilegt árásinni sem gerð var í apríl.

New York Times hefur eftir heimildarmönnum sínum í Ísrael að búist sé við því að Íranar muni nota bæði dróna og eldflaugar, þar á meðal skotflauga, eins og þeir gerðu í apríl. Skotmörkin eiga að vera þrjár herstöðvar og höfuðstöðvar leyniþjónustu Ísrael norður af Tel Aviv.

Þá var árásin gerð þannig að drónar og eldflaugar áttu að ná til Ísrael á sama tíma. Það tekur drónana um níu klukkustundir að fljúga milli Íran og Ísrael og stýriflaugar um tvær klukkustundir og skotflaugar um tólf mínútur.

Þetta gaf Ísraelum og Bandaríkjamönnum mikinn tíma til að skjóta niður dróna og stýriflaugar yfir Írak og Sýrlandi. Geri Íranar eingöngu árásir með skotflaugar að þessu sinni yrði fyrirvarinn lítill og mun erfiðara er að skjóta slíkar eldflaugar niður, þar sem þær fara hátt upp í gufuhvolfið og falla svo til jarðar á miklum hraðar.

Sjá einnig: Skutu nánast alla dróna og eld­flaugar niður

Eftir að þessi viðvörun var opinberuð birti Benjamín Netanjahú, forsætisráðherra Ísraels, ávarp til Ísraela þar sem hann varaði við því að erfiðir dagar væru í vændum.

Talsmaður ísraelska hersins segir að engin eldflaugaskot frá Íran hafi greinst að svo stöddu en viðvörunarstig sé mjög hátt. Ísraelar og Bandaríkjamenn fylgist náið með Íran.

Bandaríkjamenn hafa sent þrjár flugsveitir á undanförnum dögum. Er þar um að ræða F-15E orrustuþotur, F-16 og A-10 herþotur, sem eru hannaðar til að granda skotmörkum á jörðu niðri.