At­hafna­maðurinn Þráinn Haf­stein Kristjáns­son látinn

Foreldrar Þráins voru Kristján Gíslason veitingamaður og Svandís Gísladóttir húsfrú. Saman áttu þau sex börn og fæddist þeim Þráinn þann 1. ágúst 1940.

Þráinn byrjaði níu ára gamall í veitingabransanum sem móttökustjóri á veitingastað föður síns, Selfoss. Þar tók hann á móti fólki klæddur í kjólföt og lakkskó. Nítján ára gamall var hann orðinn yfirþjónn á Hótel Borg og á Naustinu. 

Þráinn var einnig mikill áhugamaður um jazz, spilaði á bæði píanó og sílófón og var um tíma formaður Jazzklúbbs Reykjavíkur. Hann hjálpaði einnig bróður sínum, Hilmari Kristjánssyni, að koma hljómsveitinni Dátum á legg og var umboðsmaður hennar. Þráinn fékk einnig erlendar hljómsveitir til að spila á Íslandi og má þar nefna The Hollies.

Stórtækur í veitingarekstri vestanhafs

Þráinn hafði mikla ástríðu fyrir faglegri framkomu og veitingastjórnun og fór því í nám við Minnesotaháskóla þar sem lagði stund á hótel- og veitingahúsarekstur. 

Illa gekk þó að fá atvinnuleyfi í Bandaríkjunum og eftir námið flutti hann ásamt eiginkonu sinni, Eddu Ólafsdóttur og börnum þeirra, Önnu Bertu og Kristján Hafstein til Winnipeg í Kanada. Seinna fæddist þeim annar sonur, Víkingur, en Þráinn átti fyrir dótturina Guðrúnu sem býr nú á austurströnd Bandaríkjanna.

Í Winnipeg vann hann með amerísku fyrirtæki að stofnun steikhúsakeðjunnar The Round Table og opnaði fyrsti veitingastaður hennar þann 7. október 1973.

Þráinn opnaði síðan fyrsta Grape’s-staðinn árið 1980 og var fljótlega fenginn til að aðstoða fjárfesta við að koma öðram veitingastað á laggirnar, Jonathan’s. Hann tók starfið að sér í þrjú ár en ákvað árið 1985 að gera Grape’s að veitingahúsakeðju og rak á tímabili fimm Grape’s-staði og fjóra Round Table-staði. 

Þá var hann yfirmaður yfir 243 svokölluðum „country kitchens“ í Norður-Ameríku, má þar nefna Swensons, Jonathan’s, The Golden Spike og Gringo’s.

Fjölskyldan í fyrsta sæti

Þrátt fyrir mikla vinnusemi þá var fjölskylda Þráins alltaf í fyrsta sæti að sögn fjölskyldumeðlima hans. Helsta ástríða Þráins voru stundirnar sem hann átti með sinni fjölskyldu, bæði í Winnipeg og á Íslandi. Hann ræktaði fjölskyldutengslin af mikilli ást og umhyggju. 

Þráinn var trúrækin maður og vann alla sína tíð í að koma boðskapnum áfram. Eftir að hann seldi sitt fyrsta og síðasta veitingahús, The Round Table, til Kristjáns sonar síns þá flutti hann frá Selkirk til Steinbach þar sem yngsti sonur hans býr ásamt fjölskyldu sinni. Þar tók Þráinn að sér sjálfboðastarf við kirkjuna þar, Southland Church.