Verk­fall sam­þykkt með 100 prósent at­kvæða í leik- og grunn­skólum

„Við fengum endanlega niðurstöðu í dag. Þetta voru fjórir leikskólar sem kennarar kusu um, þrír grunnskólar þar sem kennarar og stjórnendur greiddu atkvæði. Í öllum þessum skólum var mikil þátttaka og 100 prósent félagsfólks samþykkti að fara í aðgerðir sem hefjast þá 29. október,“ segir Magnús Þór.

Hann segir að í framhaldsskóla hafi kennarar og stjórnendur kosið saman og þar hafi 82 prósent samþykkt að fara í aðgerðir.

„Þannig skilaboðin til okkar eru skýr.“

Verkföll í átta skólum

Farið verður í verkfall í þremur grunnskólum sem hest 29. október til 22. nóvember. Það er í Áslandsskóla í Hafnarfirði, Laugalækjarskóla í Reykjavík og Lundarskóla á Akureyri.

Þá leggja kennarar í Fjölbrautaskóla Suðurlands á Selfossi niður störf frá 29. október til 20. desember.

Atkvæðagreiðsla stendur yfir meðal félagsmanna KÍ í einum tónlistarskóla. Þar er boðað að verkfall hefjist 29. október og standi til 20. desember. Niðurstaða þeirrar atkvæðagreiðslu mun liggja fyrir síðdegis á morgun en atkvæðagreiðslu lýkur klukkan 15 á morgun.

Viðsemjendur funduðu í gær á skrifstofu ríkissáttasemjara. Magnús segir það hafa verið fyrsta vinnufundinn og það hafi allir fengið heimavinnu fyrir næsta fund, sem er á þriðjudag, 15. október.

Hann segir það ekkert leyndarmál að Kennarasambandið myndi vilja sjá viðræður ganga hraðar fyrir sig en hingað til og þau vonist til þess að það verði þannig núna.

Hann segir samninga framhaldsskólakennara hafa runnið út í mars og kennara í maí. Það sé langur tími liðinn og markmið þeirra í samningsgerð hafi legið fyrir frá því í janúar. Þau hafi farið í mikla vinnu um allt land með sínu félagsfólki og þau geti ekki beðið lengur.

„Því miður finnst okkur deilan vera á þeim stað að fólk þurfi að greina þá alvöru sem við horfum til. Að samfélagið fjárfesti nú í kennurum og efli faglegt starf og stöðugleika í skólakerfunum öllum,“ segir Magnús.

Styrkir stöðu þeirra við samningaborðið

Þetta sé sú leið sem verði að fara til að styrkja þeirra stöðu við samningaborðið.

Hann segir að þeirra markmið sé að styrkja stöðugleika og efla fagmennsku innan skólakerfisins. Það þurfi að fylla skólana af fagfólki og til að gera það þurfi starfið að vera launað þannig að það endurspegli mikilvægi þess. Hann segir kröfugerðina byggða, að hluta til, á samkomulagi um jöfnun lífeyrisréttinda. Þar komi fram að jafna eigi laun á milli opinbera og almenna markaðarins. Það sé þeirra markmið.

„Að okkar sérfræðingar í skólunum séu með sambærileg laun og sérfræðingar á almennum markaði.“

Magnús segir stórt skref hafa verið stigið í dag. Það séu 19 dagar til stefnu og þeirra von sé sú að það þurfi ekki að koma til aðgerða.

„En það er alveg þannig að við erum dag frá degi og viku frá viku að meta stöðuna. Það verður bara svolítið að koma í ljós hvað næstu dagar hafa í för með sér. En einn möguleikinn er vissulega sá að fleiri skólar muni hugsa sér til hreyfings að taka þátt í aðgerðunum,“ segir Magnús.

Hann segir það ákvörðun samninganefndar og aðildarfélaganna að ákveða það. Þau hafi sem dæmi ákveðið hvaða skólar urðu fyrir valinu í þessum aðgerðum. Þeir hafi átt að endurspegla víða mynd af samfélaginu.

Hann segir sambandið ekki hafa fengið nein viðbrögð frá sínum viðsemjendum eftir að niðurstöður úr atkvæðagreiðslu lágu fyrir. Þau hafi nú ákveðinn tímaramma til að komast að niðurstöðu. Hann segist hæfilega bjartsýnn.

„Ég fer inn í öll verkefni til að klára þau af bjartsýni en verkefnið er stórt. Við værum ekki að fara í þessar aðgerðir nema að átta okkur á því að það er stórt. Það þarf að leggja mikið á sig og við erum fullkomlega tilbúin til þess.“

Fréttin hefur verið uppfærð.