Eitt barnanna al­var­lega veikt og ó­vissa fram yfir helgi

„Það hafa komið tólf börn til okkar á bráðamóttökuna og sum þeirra verið innlögð. Það er það sem við vitum núna, en við erum náttúrulega mjög snemma í ferlinu. Það geta verið börn þarna sem eru ekki þegar orðin veik,“ segir Ragnar Bjarnason, prófessor og sérfræðingur á Barnaspítala Hringsins. Börnin séu allt niður í eins árs.

Yfir hundrað börn eru á leikskólanum og Ragnar segir mögulegt að fleiri börn muni veikjast. Það velti þó á því hvernig smitið kom upp. 

„Ef það hefur komið með aðsendum mat sem allir hafa borðað, þá getur maður átt von á því. En það verða ekki allir veikir, þannig að við vitum það ekki,“ segir Ragnar.

Hann segir átta eða níu börn enn inni á spítalanum, af þeim tólf sem hafi komið á spítalann. Líklega verði einhver þeirra send heim, en þau verði áfram í eftirliti.

Alvarlegu veikindin komi fram síðar

Ragnar segir eitt barnanna alvarlega veikt, án þess að geta farið nákvæmlega út í hvert ástand þess barns er. 

„Það er það sem maður óttast. Við erum snemma í ferlinu og þetta kemur oft aðeins seinna, alvarlegu veikindin.“

Veikindin hefjist með niðurgangi sem fljótt verði blóðugur. Staðfest E.coli sé í sumum barnanna. Bakterían framleiði eiturefni sem valdi bólgum og blæðingum frá görn. Alvarlegast sé þó ef efnið kemst í nýrun, og valdi þar skaða. 

„Áhættuþáttur er að vera mjög ungur og mjög gamall. Þetta eru fyrst og fremst smábörn og síðan er þetta þekkt af hjúkrunarheimilum, þekkt stórsmit.“

Ekki sé útlit fyrir að umfang smitsins liggi almennilega fyrir strax, þar sem óljóst sé hvenær smitið varð. 

„Þetta verður óvissuástand, myndi ég telja, fram á og fram yfir helgi.“

Fólk komi ekki að óþörfu

Gripið hafi verið til ráðstafana til að draga úr smithættu á spítalanum. Starfsfólk spítalans hafi sent heim þau börn sem hægt er að senda heim, á meðan aðrar deildir spítalans hafi tekið á móti börnum sem komið hafi úr öðrum, ótengdum aðgerðum.

„Við biðlum til fólks að vera ekki að koma hingað að óþörfu. Það eru aðrir staðir sem geta sinnt minna veikum börnum, með eyrnabólgu og kvef og annað. Það er Barnalæknaþjónustan og Læknavaktin,“ segir Ragnar. Haft hafi verið samband við Barnalæknaþjónustuna og óskað eftir því að plássum þar verði fjölgað.

Verið sé að breyta deildum og útbúa stað þar sem hægt verði að hafa mörg börn með vökva í æð, ef þörf krefur. 

Aðrar pestir í gangi

„Fyrst og fremst, meðan við vitum ekki annað, þá er þetta bundið við einn leikskóla. Það vill oft bregða við að það eru að koma fleiri, á meðan barnið býr allt annarsstaðar og hefur ekki verið í kontakt, og komið með eitthvað smá niðurgangsskot. Það eru aðrar pestir í gangi,“ segir Ragnar og bendir foreldrum á að hafa þetta í huga.

Foreldrar barna í þeirri stöðu eigi því að bíða með að leita aðstoðar þrátt fyrir niðurgang hjá barni sínu, en sjá til þess að það sé vel vökvað og það pissi nóg. 

Engin lækning, en vökvinn mikilvægur

Hvað með foreldra sem eiga börn á leikskólanum, það eru væntanlega komin tilmæli til þeirra. Eru sérstök einkenni sem þau þurfa að hafa varann á með?

„Það er náttúrulega þetta með niðurganginn, fyrst og fremst. Þetta eru yfirleitt ekki uppköst sem fylgja þessu. Þetta er niðurgangur og að hann verði blóðugur. Þá viljum við fá börnin til okkar. Þangað til, þá er það bara að halda að þeim vökva, þannig að þau séu vel undirbúin ef þetta kemur upp hjá þeim,“ segir Ragnar. 

Eina lyfið sem sé í boði sé stuðningsmeðferð. Mikilvægastur þar sé vökvinn, sem gefinn sé um munn eða í æð. Ekki sé ráðlegt að nota sýklalyf, sem jafnvel geti valdið skyndilegri losun eiturefna, sem geti valdið of miklu höggi á nýru barnanna.

„Þannig að, nei það er ekki til nein lækning. Það sem maður er hræddur við er alvarleg nýrnabilun, og bráð. Það getur þýtt mikla stuðningsmeðferð, miklu meira en það sem ég tel upp hérna.“