Upp­runi smitsins var hakk frá Kjarnafæði

Börnin fengu hakk og spaghettí í matinn þann 17. október og veiktust eftir það. Hakkið var blandað nautgripa- og kindahakk frá Kjarnafæði. Það fór ekki í almenna sölu, heldur eingöngu selt til stærri eldhúsa.

Um 45 börn hafa veikst af sýkingunni. Fjögur voru á gjörgæslu í gær og 11 inniliggjandi á Barnaspítalanum.

Í tilkynningu á vef MAST segir að rannsóknir Matís staðfesti að E.coli hafi fundist bæði í hakki og í saursýnum sem voru tekin frá börnunum sem veiktust. Raðgreining á erfðaefni bakteríanna sýndi að uppruninn er sá sami.

Öll matvælasýni neikvæð nema hakkið

Í tilkynningu kemur jafnframt fram að eftir að hafa tekið ítarleg viðtöl við foreldra barnanna sem veiktust hafi sjónum verið beint að 17. október.

„Heilbrigðiseftirlit Reykjavíkur fór á staðinn og tók fjölmörg sýni til rannsóknar af matvælum sem notuð voru við matargerðina þennan dag, s.s. hakk, grænmeti, linsubaunir, melónur, haframjöl og fleira. Öll matvælasýni voru neikvæð með tilliti til E. coli að hakkinu undanskildu. Nokkur börn sem venjulega borða ekki kjöt veiktust einnig en ekki er hægt að fullyrða um smitleið hjá þeim. Hugsanlega hafa þau smitast af öðrum börnum sem sóttu leikskólann eftir að þau veiktust en áður en leikskólanum var lokað,“ segir í tilkynningu MAST.

Í tilkynningu segir að hakkið hafi verið blandað nautgripa- og kindahakk frá Kjarnafæði. Það fór ekki í almenna sölu, heldur eingöngu selt til stærri eldhúsa, svo sem veitingastaða, mötuneyta og leikskóla.

Tóku hakkið úr umferð

Matvælastofnun hafði samband við forsvarsmenn fyrirtækisins þegar grunur beindist að hakkinu og hafði fyrirtækið samdægurs samband við alla aðila sem fengu hakk úr sömu framleiðslulotu og notað var í leikskólanum Mánagarði. Við innköllun kom í ljós að kaupendur höfðu þegar notað það í starfsemi sinni. Engar upplýsingar hafa komið fram um smit eða veikindi hjá neytendum hjá öðrum eldhúsum.

Í tilkynningu er jafnframt bent á að E. coli bakteríur eru hluti af náttúrulegri þarmaflóru manna og dýra og geta borist í vatn, kjöt, grænmeti og önnur matvæli við framleiðslu þeirra. Mismunandi tegundir E. coli eru til. Flestar gerðir E. coli eru skaðlausar en Shigatoxin myndandi E. coli (STEC) bera gen sem skrá fyrir eiturefnum sem geta valdið veikindum (meinvirknigen). Stofnar þeirra geta þó verið mis sjúkdómsvaldandi.

Ekki gerð krafa um að allt kjöt sé laust við E. coli

Þá er bent á að samkvæmt löggjöf um kjötframleiðslu er ekki gerð krafa til framleiðenda að allt kjöt sé laust við E. coli áður en það fer á markað.

„Hins vegar eiga kjötframleiðendur að gera allt sem í þeirra valdi stendur til að minnka líkur á mengun á skrokkum og kjötvörum í ferlinu. Það er fyrst og fremst gert með hreinum gripum, réttum handbrögðum og hreinum búnaði. Sýnatökur í ferlinu miðast því við að kanna hvort vinnubrögð séu fullnægjandi.“

Þá segir að Matvælastofnun hafi árið 2018 greint frá skimun á tilvist sjúkdómsvaldandi baktería í íslensku kjöti á markaði hérlendis. Þar hafi komið fram að STEC meinvirknigen fundust í tæplega 30 prósent sýna af lambakjöti og 11,5 prósent sýna af nautgripakjöti. Sambærilegar rannsóknir hafa ekki verið gerðar á grænmeti, ávöxtum eða öðrum matvælum hér á landi.