Um þrjú hundruð vöru­bíls­farmar af efni: „Engu keyrt í burtu“

Til stendur að setja hybrid gras á völlinn með undirhita og hefur nú þegar verið grafið fyrir nýjum leikfleti vallarins. Aðeins rétt rúmar tvær vikur hafa liðið frá fyrstu skóflustungu á vellinum og undanfarið hafa verktakar frá SIS Pitches, sem sérhæfa sig í uppbyggingu sambærilegra valla, verið að störfum í Laugardalnum og er góður gangur í þeirra vinnu. Fyrsta fasa fyrsta verkhluta lýkur í desember og svo er stefnt að því að sá í völlinn í mars á næsta ári.

„Þeir byrjuðu strax að vinna í þessu eftir fyrstu skóflustunguna að taka þökurnar af, færa þær til hliðar,“ segir Þorvaldur Örlygsson, formaður KSÍ í samtali við íþróttadeild. 

„Síðan voru vélarnar ræstar og hafist handa við að grafa hér upp. Eins og þú sérð er magnið efninu komið hér til hliðar. Það er verið að grafa cirka hálfan meter niður og svo er slétt úr því. En eins og þú sérð er þetta gríðarlega mikið magn og mér skilst að þetta séu um þrjú hundruð vörubílsfarmar af efni. Við keyrum hins vegar engu í burtu, mengum ekkert í kringum okkur. Höldum efninu og eigum það til skiptanna þegar að við förum í aðrar framkvæmdir hér sem vonandi ríki og borg munu taka þátt í með okkur til að byggja upp völlinn. Þessi verkhluti, sem stendur yfir fram í desember, er á áætlun. Þeir vinna hratt og eru duglegir hjá þessu ágæta fyrirtæki SIS Pitches. Þeir verktakar sem voru hér á undan þeim voru einnig ansi fljótir að gera það sem að þeim var lagt fyrir.“

Búið er að færa leikflötinn sjálfan nær nýrri og stærri stúku vallarins, kroppað hefur verið í hlaupabrautina umhverfis völlinn sem mun á endanum hverfa og með þessu færist leikflöturinn fjær gömlu stúkunni. Stór stofnlögn fráveitu liggur undir Laugardalsvelli og búið er að kanna ástand hennar og er það gott. Með því að færa völlinn verður hægt að komast í brunn nær gömlu stúkunni.“

Gerist ekki á einu ári

Áætlanir KSÍ eru að byggja Laugardalsvöll upp í skrefum og er þetta fyrsta skrefið á þeirri vegferð. Margir spyrja sig nú, þegar að völlurinn færist nær nýrri og stærri stúku vallarins, hvað gerist í framhaldinu varðandi áhorfendastæði á Laugardalsvelli. 

„Þetta er fyrsta verkið. Þegar að við fórum í viðræður við ríki og borg var það aðal verkefnið að fá nýtt undirlag á völlinn og hita á hann. Það var fyrsta skilyrði. Fara í hybrid völl. Síðan eru menn að hugsa til lengri tíma. Að reyna byggja hér upp völl og stúkur í kring. Það yrði næsta verkefni. Ríki og borg voru ánægð með okkar stefnu. Að gera þetta smátt og smátt. Gera þetta til lengri tíma. Það er okkar verkefni. Það gerist ekki á einu ári. Það segir sig sjálft. Við horfum til framtíðar og sjáum að þegar fram líða stundir getum við átt gott og fallegt mannvirki sem allir verða stoltir af.“

Það sem þurfti

Um mikilvægi þess að fá loks völl hér sem hægt verður að gera leikhæfan allt árið um kring og spila á hafði Þorvaldur þetta að segja:

„Þetta er gríðarlega mikilvægt og hreyfingin í heild sinni er alveg sammála þessu skrefi. Þetta er það sem þurfti, ekki bara fyrir okkar landslið heldur einnig félagslið. Þau lið sem taka þátt í Evrópukeppni, þar sem að við erum að ná mjög góðum árangri og sjáum fram á það á næstu árum að okkar lið verði væntanlega í Evrópukeppni fram á haustið, jafnvel lengur. Þetta gefur okkur kost á að hafa keppnishæfan völl hér á landi allt árið svo við getum tekið þátt í þessum mótum. Þetta er mjög mikilvægt fyrir íslenska hagkerfið okkar í fótboltanum.“

Við fyrstu skóflustungu fyrir rúmum tveimur vikum síðan var það sett fram að stefnan væri að leika fyrsta leik á nýja vellinum i júní næsta sumar. Það er enn stefnan.

„Fyrsti hlutinn af þessu verkefni stendur yfir fram í desember. Svo koma þeir aftur hingað til lands í enda mars og sá í völlinn og setja í hann. Við kíkjum á hann þá og þá verður saumað í völlinn, breitt yfir hann og hitinn keyrður upp. Svo vonum við að veðrið verði með okkur.