Bölvað basl á Bond

Það er vegna þess að forsvarsmenn kvikmyndavers Amazon hafa átt í miklum deilum við Broccoli fjölskylduna, sem stýrir sögunum um Bond í gegnum framleiðslufélagið Eon, þó Amazon eigi sýningarréttinn á kvikmyndum um Bond.

Þann rétt keypti Amazon dýrum dómi þegar fyrirtækið varði 8,45 milljörðum dala eða um billjón króna í kvikmyndaver og kvikmynda- og þáttasafn fyrirtækisins MGM.

Sjá einnig: Amazon kaupir MGM og James Bond

Barbara Broccoli erfði Bond-ólina, ef svo má segja, af föður sínum en hann hafði þá í um þrjá áratugi stýrt því hvenær framleiðsla á nýrri mynd um Bond gat hafist. Barbara og stjúpbróðir hennar, Wilson Michael Wilson, hafa haldið saman í ólina undanfarin ár en Barbara hefur tekið frekar við stjórninni að undanförnu en Wilson er 82 ára gamall og hún 64 ára.

Segir Amazon-liða „helvítis fávita“

Samkvæmt heimildum Wall Street Journal hefur Barbara Broccoli lýst forsvarsmönnum Amazon sem „helvítis fávitum“ við vini sína og hefur hún sagt að hún treysti ekki Amazon til að gera Bond nægilega góð skil.

Í einföldu máli sagt stýrir Broccoli handriti mynda um Bond, ræður leikara og stýrir öðrum mikilvægum liðum þegar kemur að kvikmyndagerð. Meðal annars ræður hún því hver mun taka að sér næst að leika James Bond.

Án hennar er ómögulegt að gera nýja mynd um Bond og WSJ segir hana geta haldið Amazon í gíslingu með þessum hætti eins lengi og henni þóknast. Ekki hefur tekist að finna sögu sem þykir nægilega góð, skrifa handrit né finna nýjan leikara til að taka að sér hlutverkið.

Sambærileg staða kom upp á árum áður, milli Licence to kill (1989) og GoldenEye (1995) en þá tók það Broccoli fjölskylduna langan tíma að finna leikara sem gæti tekið við af Timothy Dalton. Eins og frægt er var Pierce Brosnan að endingu valinn.

Broccoli mun hafa sagt að hún sé þeirrar skoðunar að Bond eigi alltaf að vera leikinn af breskum manni en hún er ekki sögð mótfallin því að ráða þeldökkan eða samkynhneigðan mann í hlutverkið.

Stýrir Bond-bílnum

Forsvarsmenn Amazon hafa lagt til framleiðslu þátta um Bond eða hliðarsöguþætti um Moneypenny eða jafnvel kvenkyns 007. Innan veggja Amazon var ellefu blaðsíðna skjali dreift þar sem teknar voru fram hugmyndir um mögulega þætti og kvikmyndir úr safni MGM. Við hlið allra hugmynda sem tengdust Bond stóð: TBD og að frekari viðræðna væri þörf.

Broccoli hefur ekki viljað taka hugmyndir starfsmanna Amazon í mál og hefur þess í stað ítrekað fyrir leiðtogum Amazon að hún sé við stýri Bond-bílsins og ráði ferðinni, samkvæmt heimildum WSJ.

Í millitíðinni er það eina sem Amazon hefur gert og tengist Bond raunveruleikaþáttur sem kallast „007: Road to a Million“. Sú framleiðsla hófst áður en Amazon keypti MGM-safnið.