Hafnar­fjarðar­liðin völdu íþrótta­fólk ársins

Haukar völdu íþróttafólk ársins innan sinna raða í gær. Elín Klara Þorkelsdóttir, landsliðskona í handknattleik, var valin íþróttakona ársins en á dögunum var hún valin íþróttakona Hafnarfjarðar en báðar viðurkenningarnar er hún að hljóta annað árið í röð.

Þá var karatemaðurinn Gunnlaugur Sigurðsson valinn íþróttakarl Hauka og knattspyrnuþjálfarinn Hörður Bjarnar Hallmarsson þjálfari ársins.

Í Kaplakrika völdu FH-ingar sitt besta íþróttafólk á árinu. Þar varð Aron Pálmarsson fyrir valinu sem íþróttamaður ársins en Aron var lykilmaður deildar- og Íslandsmeistara FH í handknattleik á síðustu leiktíð en hann var þá kjörinn mikilvægasti leikmaður tímabilsins sem og besti maður úrslitaeinvígisins gegn Aftureldingu.

Irma Gunnarsdóttir var valin íþróttakona FH en hún mætti Íslandsmetið í þrístökki utanhúss á síðasta ári með stökki upp á 13,61 metra en það setur hana í flokk hundrað bestu þrístökkvara í heimi á síðasta ári. Þá náði Irma einnig góðum árangri í langstökki og kúluvarpi.