Úr­slit breyta öllu: „Arnar gerir sér grein fyrir því“

„Bara mjög ánægju­legt. Við erum mjög ánægð með að þetta sé komið í höfn. Við horfum björtum augum fram veginn,“ segir Þor­valdur.

Hvaða eigin­leikum er Arnar gæddur sem gera hann góðan kost í þetta starf?

„Ef við horfum á tíma hans hjá Víkingi Reykja­vík þá sjáum við hvernig hann hefur tekið utan um leik­manna­hóp sinn, eldri sem og yngri leik­menn og náð úr­slitum. Hvernig hann hefur fengið fólk í lið með sér, bæði stuðnings­menn Víkings sem og aðdáendur aðra. Mér finnst það vera til fyrir­myndar og hann hefur heldur betur náð árangri líka. Hann er akkúrat það sem við vorum að leita eftir.“

Svo býr Arnar að lands­liðs­ferli sem leik­maður, þekkir lands­liðs­um­hverfið.

„Það hjálpar alltaf. Er kostur. Hann þekkir það á sama tíma hvernig er að vera inn á vellinum, veit hvernig menn hugsa. Það er alla­vegana ekki verra fyrir hann að hafa þessa reynslu á bakinu.“

En var Arnar efsti kostur á blaði KSÍ?

„Það má orða þetta fyrst þannig að þessir þrír þjálfara sem að við ræddum við höfðu allir eigin­leika og kosti sem eru þess eðlis að ég myndi treysta þeim öllum full­kom­lega fyrir þessu starfi. Alveg eitt hundrað pró­sent. Við vorum virki­lega heppin, ég og stjórn KSÍ, að hafa náð að tala við svo góða ein­stak­linga.

Þetta æxlaðist þannig að Freyr endaði á því að taka við Brann, frábært fyrir hann og við erum mjög stolt af því líka Ís­lendingar að við séum með þjálfara í efstu deild Noregs. Hann á svo sannar­lega eftir að standa sig vel þar. Arnar er sá kostur sem við völdum í lokin, við ákváðum að ganga til samninga við hann og náðum góðum samningum þar. Við erum mjög sátt við það.“

KSÍ samdi við Arnar en þurfti svo að landa sam­komu­lagi við Víking Reykja­vík til þess að losa Arnar undan samningi hans í Foss­voginum. Þær viðræður gengu að sögn Þor­valds ljómandi vel.

„Menn eru, eins og alltaf, að reyna semja og komast að sam­komu­lagi. Í lokin náðum við sam­komu­lagi sem við erum sáttir við. Við höldum svo áfram veginn og erum þakk­lát Víkingum fyrir að leyfa okkur að fá Arnar til liðs við lands­liðið. Ég held að þeir séu líka stoltir af því. Arnar hefur gert vel fyrir Víking Reykja­vík og við óskum bara félaginu góðs gengis áfram.“

Á hvaða for­sendum verður árangur Arnars í starfi svo metinn í fram­haldinu?

„Við eru náttúru­lega í þeim ágæta bransa að við þurfum úr­slit. Úr­slit breyta öllu. Arnar gerir sér alveg grein fyrir því og hefur gert það hingað til á sínum ferli í fót­boltanum. Við þurfum líka að horfa til þess að við erum að búa til lið og liðs­heild. Ná fram því besta úr þeim leik­mönnum sem standa okkur til boða og gera þá betri. Ég hef trú á því að Arnar geti náð því. Ég vænti mikils af honum.“