Segir Græn­lendinga yndis­lega, harðduglega og útsjónarsama

Þetta kom fram í fréttum Stöðvar 2 og í þættinum Ísland í dag. Þar kynnumst við gullævintýri sveitapilts úr Tungunum, sem fyrir áratug keypti gjaldþrota gullnámu á Suður-Grænlandi ásamt samstarfsfélögum. Merkur áfangi náðist nýlega þegar gullvinnslan í Nalunaq tók til starfa og fyrstu gullstangirnar voru steyptar.

Grænlendingar hafa sjaldan upplifað aðra eins athygli heimsfjölmiðla eftir að Donald Trump lýsti áhuga sínum á að komast yfir land þeirra. Það er hins vegar meira en áratugur frá því Eldur Ólafsson hóf samstarf við þessa næstu nágrannaþjóð Íslendinga um námavinnslu. Það var eftir að hann kynntist áhuga Kínverja á landinu.

Í viðtali í bænum Qaqortoq segist Eldur hafa notað íslenska hugmyndafræði til að nálgast grænlenska samfélagið.

„Það er alveg rétt sem þú segir; að ef það eru Bandaríkjamenn eða Kínverjar, eða hver sem það er sem kemur hingað inn, þá kemur jafnvel oft upp þessi tortryggni.

Og við vitum af þessari tortryggni á Íslandi. Við bönnuðum nú stórum aðilum að eiga land á Íslandi,“ segir Eldur, sem er stofnandi og forstjóri Amaroq-málmleitarfélagsins.

Mestu hafi skipt að ávinna sér traust og láta verkin tala.

„Bara segja sem minnst og gera sem mest og hægt og bítandi leyfa þér að kynnast samfélaginu. Og sýna fram á það að þú ert að gera hlutina á réttan hátt.“

Eldur og samstarfsmenn í Amaroq ákváðu að kaupa sem mesta þjónustu af heimaaðilum og styðja markvisst við samfélagsleg verkefni.

„Við ætlum að styðja við allt íþróttastarf. Við erum að styðja við alla aðila sem eru frumkvöðlar hérna, einkaaðilar, í til dæmis því að koma ungu fólki til vinnu.“

Þannig er félagið að gera upp gamalt virðulegt hús í Qaqortoq til að nýta það í verkefni sem virkja ungt fólk til þátttöku á vinnumarkaði.

Eldur viðurkennir að þetta sé af eigingjörnum hvötum, þeir vilji fá heimamenn í sem flest störf, en núna er um helmingur starfsmanna fyrirtækisins Grænlendingar.

En hvernig upplifir hann sjálfur að vinna á Grænlandi og starfa með Grænlendingum?

„Yndislegt. Þetta er harðduglegt fólk. Það er útsjónarsamt. Það er með gott hjarta.

Hérna í Qaqortoq hef ég verið síðustu þrjú sumur með fjölskyldu minni og börnum. Hérna er manni vel tekið. Og það er bara í alla staði gott að vera hérna,“ segir Eldur.

Hér má sjá frétt Stöðvar 2:

Nánar er fjallað um gullvinnsluna á Grænlandi í þættinum Ísland í dag, sem sjá má hér: