„Við höfum verið að skoða þetta í svona tvo mánuði hér í þröngum hópi innan fyrirtækisins og farið í mjög viðamikla og ítarlega greiningu á því að skoða evrópskan samkeppnisrétt og það leiddi til þessarar ákvörðunar í gær,“ segir Benedikt Gíslason, bankastjóri Arion banka.
Stjórn Íslandsbanka sagði í tilkynningu til Kauphallar í gærkvöldi að þeim hafi borist bréfið.
„Þetta er náttúrulega bara mjög áhugavert og eitthvað sem við munum skoða núna hratt og örugglega. Í þessu myndu náttúrulega felast mikil tækifæri en á sama tíma þurfum við að skoða vel út frá samkeppnishættinum,“ segir Jón Guðni Ómarsson, bankastjóri Íslandsbanka.
Að sögn Jóns Guðna hafi hugmyndin um samruna verið skoðuð áður en tímasetningin hafi komið örlítið á óvart. Stjórn Íslandsbanka hafi ekki verið meðvituð um að greiningarferli Arion banka stæði yfir.
„Ég ætlaði að eiga rólega helgi en það breyttist mjög hratt eins og gerist oft í þessu starfi,“ segir Jón Guðni.
Stjórn Íslandsbanka hefur fjórtán daga til að bregðast við tillögunni.
„Við skoðum þetta eins hratt og mögulegt og er og hvort við nýtum þessa fjórtán daga, það kemur bara í ljós,“ segir Jón Guðni.
Forsenda samrunans að allir græði
Í bréfi Arion banka, sem lesa má hér, kemur fram að beinn sparnaður íslenskra neytenda vegna samrunans sé áætlaður að lágmarki fimmtíu milljarðar króna á næstu tíu árum. Að sögn Benedikts sé forsenda samrunans að hann sé góður fyrir alla sem að honum koma.
„Ég held að það séu forsendurnar fyrir því að slíkur samningur yrði leyfður. Það þarf að tryggja að hagræðing sem í honum felst skili sér til neytenda,“ segir Benedikt.
„Við erum búin að vera blanda okkur í þessa umræðu um Íslandsálagið, þessi sér álög sem íslenskir neytendur eru að greiða og við teljum að þetta sé í rauninni stærsta framfaraskref sem hægt er að taka til hagsbóta fyrir neytendur.“
Svokölluð Íslandsálög stafi af smæð markaðsins hérlendis og sértækri skattlagningu. Íslensk fjármálafyrirtæki séu agnarsmá í evrópsku samhengi en þurfti samt sem áður að fylgja sama regluverki og evrópsk stórfyrirtæki. Þetta feli í sér aukinn kostnað hérlendis.
Jón Guðni er sammála því að bæði viðskiptavinir bankanna og hluthafar gætu grætt á samrunanum.
„Ég held það sé ljóst í svona samruna að það séu mikil tækifæri bæði fyrir viðskiptavini og svo hluthafa. Á sama tíma er, eins og bent er þar á [í bréfi Arion Banka], mjög mikið og dýrt regluverk sem er í kringum bankakerfið og burtséð frá þessu þá er þetta mikið tækifæri til að einfalda það,“ segir Jón Guðni.
Ætti ekki að hafa áhrif á fyrirhugaða sölu á hluta ríkisins
Bréf stjórnar Arion banka var sent sama dag og Stjórnarráðið tilkynnti fyrirkomulag á fyrirhugaðri sölu á 42,5 prósenta hluta sínum í Íslandsbanka.
„Við sögðum í bréfinu sem var birt opinberlega að við teldum að þetta myndi ekki hafa nein áhrif á fyrirætlanir stjórnvalda að selja hlutinn, að minnsta kosti er þetta ekki að rýra verðgildi hans, en það er auðvitað eigendanna að taka næstu skref þar,“ segir Benedikt.
Jón Guðni segir að stjórn Íslandsbanka muni ræða við ríkisstjórnina.
„Það er einmitt eitt af því sem þarf að skoða mjög vel og eitthvað sem við þurfum að ræða við ríkið líka. Við þurfum að gera allt til að styðja þau í þeirra ferli og þeirra vinnu sem er fram undan,“ segir Jón Guðni.
Gæti strandað hjá Samkeppniseftirlitinu
Snorri Jakobsson hagfræðingur sagði í kvöldfréttum Stöðvar 2 í gær að fyrstu viðbrögð hans við tilkynningu um samruna voru að það yrði ekki hægt. Samkeppniseftirlitið myndi ekki heimila samrunann. Heimir Örn Herbertsson, sérfræðingur í samkeppnisrétti, sagði samrunann byrja í brekku hjá Samkeppniseftirlitinu.
„Ég held að þau [Samkeppniseftirlitið] muni skoða þetta út frá evrópska regluverkinu og taka sér góðan tíma í það. Sé það hægt að tryggja að þessi skilyrði, sem eru fyrir láréttum samruna svona stórra fyrirtækja, séu uppfyllt þá held ég að þau verði að taka þetta til alvarlegrar skoðunar,“ segir Benedikt.
Málið sé nú á borði stjórnar Íslandsbanka. Samþykki hún samrunann gæti samkeppnisskoðun tekið eitt til eitt og hálft ár. Samþætting bankanna tæki síðan eitt til tvö ár í viðbót.
