Rekin eftir að hafa neitað að endur­nýja byssu­leyfi Mels Gibson

Náðunarfulltrúi (e. pardon attorney) er ópólitískt embætti sem fer með stjórn mála sem tengjast náðunum forsetans og hefur Elizabeth G. Oyer setið í embættinu frá því Joe Biden skipaði hana árið 2022.

Oyer sagðist í samtali við New York Times hafa verið að vinna að því í síðustu viku að veita fólki aftur skotvopnaleyfi sem það hafði misst eftir að hafa verið sakfellt fyrir glæpi. Lögum samkvæmt mega dæmdir glæpamenn ekki kaupa eða eiga byssur en ráðuneytið hefur völd til þess að yfirstíga þá hindrun.

Starfshópur á skrifstofu Oyer hafi upphaflega búið til lista með 95 einstaklingum sem áttu að fá skotvopnaleyfið sitt aftur. Þar hafi aðallega verið einstaklingar með áratugagamla dóma sem hafi óskað eftir því að fá leyfi sitt að nýju og voru taldir ólíklegir til að brjóta aftur af sér.

Sá listi var sendur á skrifstofu aðstoðardómsmálaráðherra, Todd Blanche, sem fækkaði nöfnunum úr 95 niður í níu. 

Oyer segist síðan hafa verið beðin um að gera minnisblað þar sem mælt væri með að þessir níu einstaklingar fengju vopnaleyfi að nýju. Hún hafi gert það fimmtudaginn 6. mars og skömmu síðar fengið aðra beiðni um að bæta einu nafni á listann, Mel Gibson.

Persónulegt samband við Trump væri nægur grundvöllur

Með beiðninni um viðbót Gibson segir Oyer að hafi fylgt bréf frá lögfræðingi leikarans sem hann hafði sent á tvo háttsetta embættismenn innan ráðuneytisins, James R. McHenry III og Emil Bove III, í janúar. 

Lögfræðingurinn talaði fyrir því í bréfinu að Gibson fengi aftur skotvopnaleyfið, hann hefði verið skipaður í Hollywood-sendinefnd af Trump og hefði gert fjölda stórra vinsælla mynda. 

Þann 16. janúar, fjórum dögum áður en Trump tók við forsetaembættinu, skipaði hann Gibson, Sylvester Stallone og Jon Voight sem „sérstaka sendiherra að hinum mikla en bágstadda stað, Hollywood í Kaliforníu.“

Oyer sagði það að gefa fólki byssur sem hefði gerst sekt um heimilisofbeldi ekki vera eitthvað sem hún gæti auðveldlega mælt með. Því gætu fylgdu raunverulegar afleiðingar þegar fólk með sögu af heimilisofbeldi hefði umráð yfir byssum. 

Hún hafi því lýst andstöðu sinni við að bæta nafni Gibson á listann. Fulltrúi af skrifstofu aðstoðardómsmálaráðherra hafi þá spurt hana hvort hún væri „sveigjanleg“. Þegar hún sagðist ekki vera það hafi fulltrúinn skipt um gír úr vinalegum í yfirlætislegan og loks yfirgangssaman. 

Hann hafi síðan útskýrt fyrir henni að Mel Gibson ætti persónulegt samband við Trump sem ætti að vera nægilegur grundvöllur fyrir því að hún mælti fyrir endurnýjun leyfisins og það væri best fyrir hana að gera það.

Ákvörðunin hafi gert út um hana

Oyer lýsir því hvernig hún hafi ekki getað sofið eftir samtalið meðvituð um að hún þyrfti annað hvort að gefa eftir og fara gegn eigin siðferði eða missa vinnuna.

Á föstudeginum í síðustu viku, degi eftir ákvörðun hennar, var hún síðan rekin ásamt einum öðrum háttsettum embætti ráðuneytisins. The Times segir tvo nafnlausa heimildarmenn hafa staðfest frásögn Oyer af atburðunum.

„Ég trúi þessu ekki en ég held í alvörunni að Mel Gibson muni verða mér til falls,“ segir Times að Oyer hafi sagt við kollega sinn. Hún telur að ráðuneytið muni á næstunni tilkynna hverjir fá endurnýjað skotvopnaleyfi en sú tilkynning hefur ekki enn borist.

Á laugardaginn sást til Gibson á bardaga UFC í Las Vegas með Kash Patel, nýskipuðum forstjóra FBI. Dana White, forseti UFC, lýsti því yfir á viðburðinum að Patel væri „dauðans alvara“ um að fá starfsfólk UFC til að þjálfa starfsmenn Alríkislögreglunnar.