Vill menntun fremur en refsingar: „Ó­trú­lega skakkt“

Davíð sagði í samtali við Vísi í vikunni að hann gerði ráð fyrir að veðmál væru töluvert algengari á meðal leikmanna í íslenskum fótbolta en komið hefur í ljós. Veðmál séu orðin svo samofin flestallri fótboltatengdri umræðu að það komi vart annað til greina.

„Ég held það viti allir að það eru einhverjir í þessu að veðja á leiki. Auðvitað er þetta bannað en því miður er þetta eitthvað sem fylgir íþróttinni. Það er eitthvað sem við ráðum ekki við,“ sagði Davíð við Vísi fyrr í vikunni.

Elmar Atli Garðarsson, fyrirliði Vestra, var dæmdur í tveggja mánaða bann vegna brota á veðmálareglum og mun hann missa af sjö deildarleikjum vestanliðsins í upphafi móts. Áður hafa Sigurður Gísli Bond Snorrason og Steinþór Freyr Þorsteinsson sætt lengri bönnum vegna brota á veðmálareglum.

Sandro Tonali, leikmaður Newcastle, lauk nýlega tíu mánaða banni vegna veðmálabrota og Ivan Toney, fyrrum framherji Brentford, fór í átta mánaða bann vegna samskonar konar. Daniel Sturridge, Joey Barton og Kieran Trippier eru dæmi um aðra leikmenn sem hafa sætt bönnum.

Fengi aðstoð í almennu réttarkerfi

Davíð Smári segir skjóta skökku við að KSÍ og önnur íþróttasambönd beiti leikbönnum sem viðurlögum við brotum á reglunum.

„Ég velti því fyrir mér hvort það væri meiri lausn, fremur en að setja menn í bönn fyrir svona hluti, hvort það væri ekki hægt að skikka þá til að sitja einhverskonar meðferð við þessu. Að það sé verið að reyna að hjálpa leikmönnum fremur en að refsa þeim,“ segir Davíð í samtali við íþróttadeild.

„Við lítil og væg brot í almennu réttarkerfi þá fá menn einhversskonar sekt, samfélagsþjónustu eða slíkt til að reyna að hjálpa mönnum. Mér fyndist það miklu eðlilegra,“

„Svo má ekki gleyma því að það er ekki aðeins verið að refsa honum, heldur einnig verið að refsa félaginu. Það finnst mér ótrúlega skakkt. Það er auðvitað gríðarlegur missir fyrir okkur að missa fyrirliðann okkar. Fremur en að hann sitji einhverja fundi, fái upplýsingar og einhver verkfæri til nýta sér gegn þeirri fíkn sem þetta virðist nú vera í okkar íþróttaumhverfi,“ segir Davíð Smári jafnframt.

Líkt fram kemur í fyrri frétt Vísis hafa íþróttayfirvöld víða um Evrópu lagt sig fram við að takmarka veðmálaauglýsingar. Ákall hefur heyrst um að slaka á reglum um slíkar auglýsingar hér en sem stendur mega Íslenskar getraunir (Lengjan, Lottó, 1X2) einar auglýsa slíka starfsemi hérlendis.

Lesa má nánar um það hér.