Martin um EM dráttinn: „Yrðu al­gjör for­réttindi að mæta þeim á vellinum“

EM hefst undir lok ágúst­mánaðar og þar mun Ís­land leika í D-riðli í Katowice í Póllandi sem eins konar sam­starfsþjóð heima­manna. Fyrir drátt dagsins var ljóst að Pólland sem og Slóvenía yrðu í riðli Ís­lands en við riðilinn í dag bættust lands­lið Belgíu, Ís­rael, Frakk­land.

„Mér hefði alveg litist vel á þetta sama hvað,“ segir Martin í samtali við íþróttadeild. „Ég var ekki með ein­hverja óskamót­herja þannig séð og það hefði verið erfitt að setja saman ein­hvern draumariðil upp á að reyna gera ein­hverja hluti. Mér lýst bara vel á þetta. Þetta verður erfitt, það er alveg vitað og hefði orðið erfitt alveg sama hvað.“

„Það er sér­stak­lega gaman að fá Slóvenana, maður vissi að þeir væru á leiðinni í okkar riðil. Belgía, Pólland og Ís­rael eru allt svona þjóðir sem að henta okkur ekkert full­kom­lega en verður gaman að máta sig við þær. Hefði ég svo þurft að velja eitt lið úr efsta styrk­leika­flokki þá hefði ég ekki valið Frakkana. Ég skal alveg viður­kenna það. Það var það eina sem ég krossaði fingur yfir að myndi ekki gerast, að við myndum fá Frakkana. Bæði út af þeirra getu í körfu­bolta en einnig sökum þess að ég á fleiri vini í hinum lands­liðunum í efsta styrk­leika­flokki. Það hefði verið gaman að hitta þá og spila á móti þeim.“

Geimveran illviðráðanlega

„Frakkarnir eru náttúru­lega bara ógnar­sterkir. Það lands­lið sem er nú­mer tvö í heiminum í dag á eftir Bandaríkjunum en það verður kannski gaman að geta sagt frá því seinna meir að maður hafi spilað á móti Wembanyama ef hann ákveður að vera með á mótinu.“

Martin á þar við „geim­veruna“ Victor Wembanyama sem er 2,21 metri á hæð og spilar ekki eins og hefðbundinn maður af hans stærð. Wem­by hefur komið af miklum krafti inn í NBA deildina með liði San Antonio Spurs og aðeins 21 ára að aldri er búist við miklu frá honum í framtíðinni. Hann er einn af fjölmörgum ógnar­sterkum leik­mönnum Frakk­lands en í þessum D-riðli eru Ís­lendingar mögu­lega að fara mæta tveimur af mest spennandi leik­mönnum í heimi. Wem­by og Luka Doncic, leik­manni Los Angeles Lakers í NBA deildinni.

„Það er náttúru­lega bara mjög mikil spenna ríkjandi gagn­vart þeim mögu­leika og yrðu al­gjör forréttindi að mæta þeim á vellinum. Við værum þá að spila á móti tveimur af stærstu körfu­bolta­stjörnum í heiminum í dag. Framtíðar meðlimum í frægar­höll NBA deildarinnar ef allt gengur upp hjá þeim. Þrjár stærstu stjörnurnar á þessum móti eru þeir tveir og svo Nikola Jokic í lands­liði Serbíu. Við fáum tvær af þeim sem er geggjað og kannski enn skemmti­legra fyrir fólkið sem ætlar að flykkjast til Póllands og styðja við bakið á okkur. Að fá að sjá þessa leik­menn spila körfu­bolta með berum augum og átta sig á því hversu góðir þeir eru í raun og veru í körfu­bolta, hvað þeir eru stórir fyrst og fremst. 

Menn virðast vera minni í sjón­varpinu, treystu mér ég fæ að heyra það reglu­lega. Fólk heldur að ég sé 1,70 metrar á hæð en svo sér það mig úti á götu og sér að ég er stærri en það hélt. Þetta fólk fær lík­legast sjokk þegar að það sér þá tvo með eigin augum. Ég hugsa að þetta muni draga enn þá fleiri áhorf­endur að okkar riðli. Það eru margir körfu­bolta áhang­endur sem munu koma til Póllands bara til þess eins að sjá þá tvo spila. Það gerir þetta enn þá skemmti­legra.“

„Ætla ekki að búa til einhverjar fyrirsagnir“

Þetta er í þriðja sinn sem Ís­land tekur þátt á stór­móti í karlakörfunni og er liðið í leit að sínum fyrsta sigri þar.

Ertu bjartsýnn á að við náum að landa fyrsta sigrinum?

„Ég er alltaf bjartsýnn, það breytist ekkert en ég tel að hóf­leg væntinga­stjórnun sé skyn­sam­leg í þessu. Þegar að maður horfir til baka á okkar fyrsta stór­mót árið 2015 þá fórum við þangað með engar væntingar inn í mótið og allt annað yrði bara plús. Við stóðum okkur náttúru­lega bara frábær­lega á því móti.

Tveimur árum seinna fórum við á okkar næsta stór­mót og ætluðum að sigra heiminn, vinna hvern einasta leik og vorum búnir að skrifa í daga­talið hjá okkur hvaða leikir yrðu auðveldir. Leikur gegn Póllandi yrði öruggur sigur og hitt og þetta.

Ég ætla að reyna segja sem minnst núna. Við erum líka bara bestir þegar að við erum ekki með neinar væntingar. Förum bara inn í þetta auðvitað til þess að vinna og gera okkar besta, sjá hvert það kemur okkur. Auðvitað ætlum við að vinna, reyna að vinna alla­veganna þennan fyrsta sigur á EM og koma okkur þar með í þann hóp að vera besta ís­lenska lands­liðið í sögunni. Vera eina ís­lenska lands­liðið sem hefur unnið leik á EM, ég held að það muni sjálf­krafa koma okkur á þann stall að vera besta ís­lenska lands­lið sögunnar. 

Við sjáum bara hvað verður en ég ætla ekki að fara búa til ein­hverjar fyrir­sagnir fyrir þig á þá leið að við séum að fara vinna þrjá leiki í þessum riðli. En það eru alla­vegana þrjú lið í þessum riðli sem við eigum aðeins betri mögu­leika gegn og ég tel að fólk sem getur unnið smá heima­vinnu átti sig á því um hvaða lið ræðir þar.“