Hvernig tollarnir eiga að vera á að liggja fyrir á miðvikudaginn, 2. apríl.
Trump sagði í gærkvöldi að tollum yrði beitt gegn „svo gott sem“ öllum ríkjum sem eiga í viðskiptum við Bandaríkin og hefur Wall Street Journal eftir heimildarmönnum sínum úr Hvíta húsinu að forsetinn hafi þrýst á ráðgjafa sína um að gera áætlanir um hærri tolla en áður hefur verið talað um og á fleiri lönd.
Ekki liggur fyrir hvernig tollum verður beitt en samkvæmt heimildum WSJ er til umræðu að beita næstum öll ríki tuttugu prósenta tolli. Er það í takt við umræðu Trumps fyrir forsetakosningarnar í fyrra.
Einnig er til skoðunar að beita tollum gegn öllum ríkjum sem Bandaríkin eru með viðskiptahalla við, með því markmiði að reyna að jafna þann halla út.
Einn heimildarmaður WSJ segir að Trump hafi kallað eftir „stórri og einfaldri“ áætlun. Það muni líklega fela í sér umfangsmeiri aðgerðir en áður hafi verið talað um.
Litið er til almennra tolla til að auka mögulega tekjur ríkisins og vega upp á móti skattalækkunum sem Repúblikanar á þingi ætla að framkvæma.
Öll ljós rauð
Markaðir hafa ekki farið vel af stað í morgun og búast fjárfestar við töluverðri óreiðu í vikunni. Vísitölur í Japan og Taívan hafa til að mynda fallið um rúm fjögur prósent, samkvæmt frétt New York Times.
Svipaða sögu er að segja af mörkuðum í Evrópu og flest ljós loga líka rauð í Kauphöllinni, þegar þetta er skrifað.
Stærsta ástæða þess að búist er við óreiðu í vikunni er væntanleg tollayfirlýsing Trumps á miðvikudaginn.
Frá því hann varð forseti hefur Trump ítrekað talað fyrir tollum, sem hann segir að geti verið notaðir til að afla miklum tekjum fyrir Bandaríkin. Hann hefur einnig talað fyrir því að skipta sköttum út fyrir tolla.
Trump hefur sagt að aldrei hefði átt að leggja tolla til hliðar í staðinn fyrir tekjuskatt árið 1913.
Í einföldu máli sagt virðist Trump sjá tolla fyrir sér sem fjölnota tól. Hann vill nota þá til að afla tekna, breyta neysluvenjum Bandaríkjamanna og til þess að auka innlenda framleiðslu. Þá hefur hann einnig talað fyrir því að nota tolla sem einhverskonar barefli og vill hann til að mynda nota tolla til að þvinga Kanadamenn til að ganga inn í Bandaríkin.
