Sjáðu hitt rauða spjaldið sem Gylfi hefur fengið á ferlinum

Gylfi þreytti frumraun sína fyrir Víking þegar liðið tók á móti ÍBV í 1. umferð Bestu deildarinnar í gær. Gylfi var í byrjunarliði Víkinga en lék aðeins tæpan klukkutíma því á 55. mínútu fékk hann beint rautt spjald fyrir brot á Eyjamanninum Bjarka Birni Gunnarssyni.

Þetta er aðeins annað rauða spjaldið sem Gylfi fær á ferlinum og það fyrsta síðan í ársbyrjun 2015.

Hitt rauða spjaldið fékk hann í bikarleik Blackburn Rovers og Swansea City 24. janúar 2015. Gylfi kom Swansea yfir á 21. mínútu í leiknum á Ewood Park en Blackburn svaraði með þremur mörkum.

Í uppbótartíma tæklaði Gylfi Chris Taylor niður á miðjum vellinum og var sendur í sturtu. Brotið má sjá í spilaranum hér fyrir neðan.

Gylfi mátti gera sér að góðu að fylgjast með næstu þremur leikjum Swansea úr stúkunni, á meðan hann tók út leikbann.

Þrátt fyrir að missa Gylfa af velli í gær vann Víkingur ÍBV, 2-0. Daníel Hafsteinsson og Gunnar Vatnhamar skoruðu mörk Víkinga.

Næsti leikur Víkings er gegn bikarmeisturum KA á sunnudaginn. Þar tekur Gylfi út leikbann.