Far­þegum fjölgaði um 24 prósent í apríl

Þar segir að framboð sé mælt framboðnum sætiskílómetrum hafi aukist um 25 prósent frá apríl á síðasta ári og farþegaflutningar mældir í seldum sætiskílómetrum hafi einnig aukist um 25 prósent. Sætanýting var samkvæmt tilkynningunni 81 prósent og stundvísi var 91 prósent, þremur prósentustigum hærri en í apríl í fyrra.

Seldir blokktímar í leiguflugi voru samkvæmt tilkynningunni 82 prósent fleiri en í apríl í fyrra og fraktflutningar jukust um 12 prósent. Kolefnislosun á hvern tonnkílómetra dróst saman um 3 prósent.

„Við sjáum áframhaldandi góðar farþegatölur en farþegaflutningar jukust um 25 prósent miðað við apríl í fyrra. Þessi vöxtur var knúinn áfram af 25 prósent aukningu í framboði milli ára þar sem við hófum seinni tengibankann í Keflavík fyrr en áður, sem er hluti af stefnu okkar að vaxa utan háannar til þess að jafna árstíðabundna sveiflu og nýta innviði okkar betur allt árið um kring,“ segir Bogi Nils Bogason, forstjóri Icelandair, í tilkynningunni.

Tímasetning páska jákvæð

Hann segir tímasetningu páskana í ár hafa haft jákvæð áhrif á eftirspurn í leiðakerfinu.

„Það er ánægjulegt að fjöldi farþega á markaðnum frá Íslandi jókst um 37 prósent sem staðfestir sterka stöðu Icelandair á heimamarkaði sem það flugfélag sem Íslendingar kjósa að ferðast með. Þá fjölgaði farþegum á markaðnum til Íslands um 31 prósent auk þess sem fjöldi tengifarþega jókst um 20 prósent. Þessi mikli vöxtur á framboði leiddi til sterkrar tekjumyndunar þar sem tekjur á hvern seldan kílómetra héldust óbreyttar á milli ára,“ segir Bogi.

Þá segir hann rekstur leiðakerfisins hafa gengið vel í apríl.

„Árangurinn er sérstaklega ánægjulegur í ljósi þess að flugáætlun félagsins í apríl hefur aldrei verið stærri ásamt því að öll páskaumferðin féll innan mánaðarins. Þessi árangur er fyrst og fremst að þakka frábærri frammistöðu starfsfólks félagsins og áframhaldandi áherslu okkar á skilvirkni í rekstrinum.“