Skiptar skoðanir á vistaskiptum Úlfars sem hætti á mið­nætti

Stormasamt á stóli dómsmálaráðherra

Áslaug Arna Sigurbjörnsdóttir, þáverandi dómsmálaráðherra skipaði Úlfar Lúðvíksson í embætti lögreglustjórans á Suðurnesjum í nóvember 2020. Nú í árafjöld hefur Sjálfstæðisflokkurinn haldið um stjórnartaumana í dómsmálaráðuneytinu en það er dómsmálaráðherra sem skipar lögreglustjóra til fimm ára í senn sem síðan fara með stjórn lögregluliðs í sínu umdæmi. Undanfarin ár hefur verið fremur stormasamt í stóli dómsmálaráðherra en sem dæmi þá hafa alls sex dómsmálaráðherrar komið og farið frá árinu 2017. Alls skiptist landið í níu lögregluumdæmi en lögregluumdæmið á Suðurnesjum hefur mikið verið í umræðunni hin síðustu ár og mikið mætt á lögreglunni, ekki síst vegna jarðhræringa, eldgosa annars vegar og svo útlendingamála og aukningar á skipulagðri brotastarfsemi hins vegar. Úlfar hefur talað hreint út um málefnin sem undir eru og afar blátt áfram.

Fordæmir ákvörðun ráðherra

Sigmundur Davíð Gunnlaugsson, formaður Miðflokksins, lítur svo á að Úlfar hafi, með ákvörðun dómsmálaráðherra um að endurnýja ekki samninginn, verið rekinn. Hann lagði mat á atburðarásina á samfélagsmiðlum Miðflokksins í gær.

„Þetta var ekki það sem við þurfum frá dómsmálaráðherra; að reka þann lögreglustjóra sem hefur talað hreint út um stöðuna í útlendingamálum, skipulagða glæpastarfsemi og það ófremdarástand sem ríkir á því sviði og ræða landamærin og ekki nóg með það heldur grípa til ráðstafana,“ mátti heyra Sigmund segja á myndskeiði.

Ákvörðun ráðherra mögulega til marks um nýtt verklag

Grétar Þór Eyþórsson prófessor í stjórnmálafræði við Háskólann á Akureyri var beðinn um að rýna í atburðarásina sem leiddi til þess að Úlfar er nú horfinn á braut. Hann sagði að mögulegt sé að ráðherra sé með ákvörðuninni að innleiða nýtt verklag þar sem það eigi ekki að vera sjálfsagt að fá framlengingu. Þá geti eins vel verið að verið sé að reyna að koma öðrum pólitískum litum inn í kerfið.

„Svona eins og það sem ég þekki til, ef það er ákveðið með sex mánaða fyrirvara að auglýsa eftir þessi fimm ár, þá hefur nú kannski verið litið gjarnan á það sem einhverja vísbendingu um að það eigi að þaka viðkomandi fyrir vel unnin störf en hvort það er akkúrat það sem átti sér stað í þessu tilfelli get ég ekki sagt til um vegna þess að ráðherra hefur svarað því til að starfið umfangið og jafnvel eðli þess er að breytast og að það séu röksemdir fyrir því að auglýsa. Hins vegar þá náttúrlega í ljósi þess sem ég sagði áðan um hvernig litið hefur verið á þetta hingað til þá var ég ekki hissa á viðbrögðum Úlfars sem leit þannig á að það væri verið að reka hann.“

Í ljósi hefðarinnar þá?

„Í ljósi þess sem hefur viðgengist innan stjórnsýslunnar.“

Grétar segir að það sé erfitt að segja til um hvort ráðherrann taki ákvörðunina vegna einhvers sem miður hafi farist í starfi Úlfars.

„Það hefur nú verið vitnað í einhver ummæli sem hafa farið frá honum. Hann hefur lent í smá átökum við blaðamenn í kringum Grindavík, svo það sé rifjað upp en ég veit ekkert hvort það sé verið að blanda því inn í þetta en það er ýmislegt sem kemur upp í kollinn á manni við þetta, án þess að ég geti fullyrt neitt,“ Grétar Þór Eyþórsson prófessor í stjórnmálafræði við Háskólann á Akureyri.