Engin smit­hætta vegna veikinda í vélinni

Fyrst var greint frá á RÚV en þar kom fram að flugvélin var á leið frá Zurich í Sviss til Chicago í Bandaríkjunum og sé í eigu United Airlines. Alls voru um 200 farþegar um borð en færri en tíu veiktust um borð. 

Í kjölfar þess að samhæfingarmiðstöð var virkjuð var sóttvarnalæknir kallaður til en hún hefur nú metið aðstæður og er ekki talin smithætta. Samkvæmt heimildum var ekki um að ræða almenn veikindi heldur um einhvers konar aðsvif að ræða.

Fá að fara úr vélinni

Farþegar sem veiktust voru fluttir á viðeigandi heilbrigðisstofnanir og er málið nú unnið í samvinnu Lögreglunnar á Suðurnesjum og Isavia. Viðbragðsaðilar í samhæfingarmiðstöð vinna nú að því að pakka saman.

„Það er ekki talin þörf á að aðhafast frekar. Það er verið að færa fólk úr vélinni en hún fer ekkert í dag,“ segir Hjördís Guðmundsdóttir samskiptastjóri almannavarna.

Fréttin hefur verið uppfærð.