Erlent

Svíar leigja fangelsis­pláss í Eist­landi

Kjartan Kjartansson skrifar
Frá eistnesku borginni Tartu þangað sem Svíar ætla að senda fanga til afplánunar.
Frá eistnesku borginni Tartu þangað sem Svíar ætla að senda fanga til afplánunar. Vísir/Getty

Sænsk stjórnvöld hafa gert samkomulag við Eistland um að leigja um fjögur hundruð fangaklefa sem geta hýst allt að sex hundruð sænska fanga. Samningurinn á að leysa úr þröngri stöðu í fangelsismálum í Svíþjóð.

Ulf Kristersson, forsætisráðherra Svíþjóðar, lýsir samningunum sem sögulegum. Með honum fjölgi fangelsisplássum í Svíþjóð verulega.

Fangaklefarnir sem Svíar leigja eru í fangelsi í Tartu, næststærstu borg Eistlands. Fyrir þá greiða Svíar 8.500 evrur á mánuði, jafnvirði rúmra 1,2 milljóna íslenskra króna. Sænska dómsmálaráðuneytið segir það umtalsverðan sparnað því fangelsispláss í sænsku fangelsi kostar um 11.500 evrur, jafnvirði hátt í 1,7 milljóna króna.

Aðeins karlmenn eldri en átján ára gætu verið látnir afplána refsingu sína handan Eystrasaltsins og aðeins þeir sem ekki eru taldir sérstaklega hættulegir, að því er segir í frétt sænska ríkisútvarpsins. Klefarnir í eistneska fangelsinu eru sagðir af sambærilegum gæðum og í Svíþjóð.




Fleiri fréttir

Sjá meira


×