Snýr aftur til Ís­lands betri en nokkru sinni áður

Dani­elle spilaði með liði Elfic Fri­bourg í Sviss á síðasta tíma­bili þar sem að hún spilaði stúra rullu varð bikar­meistari, spilaði í Evrópu­bikarnum og varð nærri því að landa svis­senska meistara­titlinum. Það komu margir áhuga­verðir kostir inn á hennar borð eftir það tíma­bil.

„Það var mögu­leiki fyrir mig að halda áfram með liðinu mínu úti í Sviss, þá voru aðrir kostir á borðinu með liðum sem spila í Eurocup og eitt lið í Euro­leagu­e hafði sam­band. Þessir kostir gengu ekki upp. Ég trúi því að það hafi gerst svo að eitt­hvað frábært geti átt sér stað hér með Njarðvík.“

Buðust margir frábærir kostir

Í Sviss fékk Danielle að upp­lifa lífið sem at­vinnu­maður í körfu­bolta og það átti vel við hana.

„Þetta var fag­mann­legt um­hverfi. Þarna var ég bara sem leik­maður í fullu starfi, ekki að þjálfa með fram því hlut­verki og allir þjálfararnir þínir voru í fullu starfi við að vera þjálfarar. Nokkrar æfingar á dag og ég fékk því að upp­lifa mig sem at­vinnu körfu­bolta­konu í fullu starfi. Frábær reynsla fyrir mig.“

Þá skyldi engan undra að mörg lið hér heima hafi sett sig í sam­band við Dani­elle sem hefur nær slit­laust frá árinu 2016 verið með bestu leik­mönnum efstu deildar.

„Mér buðust margir frábærir kostir hér á Ís­landi. En það spilaði inn í ákvörðun mína að ég bý í Njarðvík nánast í sömu götu og liðið æfir og spilar sína heima­leiki, hér ríkir mikill metnaður og liðinu gekk vel á síðasta tíma­bili og ég var mjög hrifinn af því hverju Einar þjálfari náði út úr þessu liði. Margir hlutir sem gerðu þetta að góðum kosti.“

Ætlar sér Íslandsmeistaratitil eða tvo

Njarðvík varð bikar­meistari á síðasta tíma­bili en laut í lægra haldi í baráttunni um Ís­lands­meistara­titilinn í odda­leik í úr­slita­ein­víginu gegn Haukum. Búið er að endur­semja við sterka leik­menn fyrir komandi baráttu og það að fá Dani­elle inn eru sterk skila­boð um að sækja eigi þann stóra, titil sem Dani­elle á enn eftir að vinna á sínum ferli.

„Það spilar stóran þátt. Á síðasta tíma­bili vann ég minn fyrsta bikar sem at­vinnu­maður, bikar­meistara­titilinn í Sviss. Komandi aftur til Ís­lands vil ég auðvitað ná í Ís­lands­meistara­titil eða Ís­lands­meistara­titla. Eins marga og ég get náð í áður en skórnir fara á hilluna.“

Snýr aftur heim til Íslands

Góðar fréttir fyrir ís­lenskan körfu­bolta að Dani­elle sé komin aftur heim en því fylgja einnig slæmar fréttir fyrir and­stæðinga Njarðvíkur.

Ertu að snúa aftur hingað heim sem betri leik­maður?

„Klár­lega. Ég myndi klár­lega segja að ég sé að snúa aftur hingað til lands sem mun betri leik­maður.“

Dani­elle fékk ís­lenskan ríkis­borgararétt árið 2023 og spilaði sína fyrstu A-lands­leiki fyrir Ís­lands hönd í fyrra. Þrátt fyrir að hún sé fædd í Kali­forníu í Bandaríkjunum lítur hún á Ís­land sem sitt heima­land.

„Ég er alltaf að snúa aftur heim þegar að ég kem til Ís­lands. Þegar að ég segi við ein­hvern að ég ætli mér að fara heima, þá veit það fólk að ég á við Ís­land.“