Sjáðu Reed ná afar fá­gætum alba­tross með mögnuðu höggi

Þetta er aðeins í fjórða sinn sögu mótsins sem að kylfingur nær albatross, eða spilar sem sagt holu á -3 höggum.

Þetta gerði Reed á fjórðu holu sem er par fimm hola en höggið magnaða má sjá hér að neðan.

Miðað við hve sjaldgæft er að kylfingar nái albatross, sem gerist samtals í heiminum öllum nokkur hundruð sinnum á ári, er magnað að Reed skyldi ná því á einu af risamótunum fjórum. Hann var reyndar heillengi að átta sig á því hvað hafði gerst, eftir annað höggið sitt, en spurði svo með látbragði hvort að boltinn hefði farið ofan í holuna. Fagnaðarlætin við flötina svöruðu því. 

Áður höfðu aðeins T. C. Chen árið 1985, Shaun Micheel árið 2010 og Nick Watney árið 2012 náð albatross á Opna bandaríska mótinu, frá því að farið var að geyma gögn um nákvæmt skor manna árið 1983.

Keppnin er í beinni útsendingu á Sýn Sport Viaplay. Þegar þetta er skrifað er Reed hálfnaður með fyrsta hring og lék hann á -1 höggi, eftir að hafa fengið þrjá skolla, fugl og albatrossinn.

Reed er sem stendur í 7. sæti en efstur er J. J. Spaun sem kláraði fyrsta hring á -4 höggum. Scottie Scheffler, sem fyrir fram þótti sigurstranglegastur á mótinu, er á +2 höggum eftir fyrstu níu holurnar. Rory McIlroy er búinn með fyrsta hring á +4 höggum, sem og Bryson DeChambeau sem lék á +3 höggum.

Stöðuna á mótinu má finna hér.