Upp­gjörið: Stjarnan - Breiða­blik 0-3 | Blikar á toppnum næsta mánuðinn

Breiðablik vann öruggan 3-0 sigur gegn Stjörnunni í Garðabæ í dag, í síðustu umferð Bestu deildar kvenna fyrir EM-hléið sem nú tekur við næsta mánuðinn. Sigurinn kom Blikum upp fyrir Þrótt og aftur á toppinn.

Blikar byrjuðu af krafti strax frá fyrstu mínútu þegar Birta Georgsdóttir fékk boltann hátt uppi á velli Stjörnukvenna og kom honum fyrir markið þar sem Agla María Albertsdóttir var mætt en hún náði ekki að koma boltanum á rammann.

Blikakonur voru duglegar að sækja en voru þrívegis dæmdar rangstæðar áður en fyrsta markið kom eftir aukaspyrnu Öglu Maríu Albertsdóttir. Boltinn féll í teiginn og skoppaði fyrir Sammy Smith sem tók boltann viðstöðulaust og kom honum í netið.

Breiðablik var með nokkra yfirburði í fyrri hálfleik en Stjörnukonur áttu nokkrar góðar sóknir en náðu ekki að gera sér mat úr þeim.

Stjörnukonur komu fullar eldmóðs út í seinni hálfleik og náðu nokkrum góðum sóknum. Það dugði þó ekki til.

Á 53. mínútu bætti Birta Georgsdóttir við öðru marki Blika eftir að Betsy Hassett missti boltann klaufalega frá sér á eigin vallarhelmingi.

Stuttu síðar skoraði Berglind Björg Þorvaldsdóttir þriðja mark Blika eftir skemmtilega og hraða sókn.

Fleiri urðu mörkin ekki og fara Blikar inn í landsleikjahléið með 25 stig á toppi deildarinnar ásamt Þrótti.

Atvik leiksins

Á 41. mínútu fellur Birna Jóhannsdóttir í teig Blika eftir tæklingu Heiðu Ragneyjar. Ásmundur dæmdi ekkert á þetta og það var mjög erfitt að sjá í endursýningu hvor þeirra náði boltanum. Hefði auðveldlega geta fallið Stjörnumegin og víti dæmt.

Stjörnur og skúrkar

Birta Georgsdóttir er virkilega öflug sóknarlega fyrir Blika og átti virkilega góðan leik.

Betsy Hassett missir boltann klaufalega í öðru marki Blika.

Stemning og umgjörð

Það þarf varla að segja það en umgjörðin hér í Garðabæ er alltaf uppá 10.

Dómarar

Ásmundur Þór Sveinsson, Guðni Freyr Ingvason og Breki Sigurðsson dæmdu leikinn þokkalega. Eina vafamálið sem er mér í huga gerðist á 42. mínútu þegar Birna Jóhannsdóttir féll í teig Blika eftir tæklingu Heiðu Ragneyjar. Það er mjög erfitt að sjá á endursýningunni hvor þeirra átti snertinguna á boltann og hvort Stjarnan hefði átt að fá víti.

Birta: Ég mun sakna hennar þvílíkt mikið

„Við töluðum um að við ætluðum að mæta hingað og skila svipaðri frammistöðu á móti Þór/KA. Vera þéttar, vera klárar í alla seinni bolta og færa okkur saman sem lið. Það gekk kannski ekki alveg nógu vel en á köflum hreyfðum við boltann vel og sköpuðum okkur nokkur færi.“

„Mjög mikilvægt fyrir okkur að enda vel fyrir pásuna og mér fannst við gera það. Komum á erfiðan útivöll á móti góðu liði og sækjum þrjú stig, við getum farið sáttar í pásuna.“

Hvernig er tilfinningin að þrír samherjar séu á leiðinni á stórmót í pásunni?

„Telma (markvörður Breiðablik) er besta vinkona mín og ég mun sakna hennar þvílíkt mikið. Þetta var síðasti leikurinn hennar í dag en það verður gaman að fylgjast með þeim og vonandi komast þær alla leið, eða allavega upp úr riðlinum.“

Telma: Ég ætla ekki að ljúga að því

„Mér fannst við ‘’ströggla’’ aðeins í fyrri hálfleik og vorum ekki nógu ‘’agressífar’’ í seinni bolta, en við löguðum það í seinni hálfleik og mér fannst við vera með fulla stjórn á þessum leik.“

Telma Ívarsdóttir hefur leikið sinn síðasta leik í Bestu deild kvenna í sumar. Nú heldur hún á EM með landsliðinu og fer að lokum aftur til Rangers eftir lánsdvölina hjá Breiðablik.

„Það er mjög erfitt að skilja við þær núna, ég ætla ekki að ljúga að því. Ég hef fulla trú á að þær klári tímabilið þó svo að ég sé farin. Ég vil ekkert meira en að sjá þær lyfta bikarnum heima.“

Finnst þér þú hafa náð að skila þínu fyrir liðið?

„Já já, ég kom heim til þess að fá að spila og ég fékk að spila. Ég fékk sjálfstraustið mitt til baka áður en að við myndum leggja af stað á stórmót og mér fannst þetta heppnast frekar vel.“

Jóhannes Karl: Ekki hægt að gera mistök á þessum svæðum

„Það var stress í okkur í byrjun, við vorum ekki að spila úr stöðum sem við eigum að vera að spila úr. Förum fljótt í langa bolta og vorum ekki með stjórn á leiknum og þá lendir þú í því að vera undir í leiknum og þurfa að vera að verjast. Mér fannst spilamennskan ekki nægilega góð.“

Voru einhver bjartsýnis merki þrátt fyrir tapið?

„Við gerum marga hluti vel en kannski á full stuttum köflum, við gerum tvenn mistök á miðjunni þar sem Blikarnir refsa okkur og það er það sem þær eru góðar í. Spilamennskan þarf að vera þannig að þú sért ekki að gera mistök á þessum svæðum.“

„Heilt yfir er holningin á okkur býsna góð, við erum þéttar og náum að leysa pressuna oft á tíðum mjög vel. Spilamennskan er þokkaleg en við þurfum að bæta okkur á síðasta þriðjungi.“

„Við ætlum að byrja á því að taka pásu og hvíla okkur aðeins, svo kemur bara stutt nýtt undirbúningstímabil. Við erum ekki að fara gefa neitt eftir í þessari pásu og það er bara fyrst og fremst að halda mönnum á tánum og keyra þetta áfram. Það er hellingur eftir af mótinu og það er stef í því sem við höfum verið að gera og við ætlum að halda því áfram.“