Valdar strætóleiðir ganga oftar og lengur

Þjónustuaukningin felst í aukinni tíðni vagna í öllum sveitarfélögum á höfuðborgarsvæðinu, lengri þjónustutíma á kvöldin, styttri ferðatíma frá Kópavogi og Breiðholti með nýrri forgangsakrein og lengri þjónustutíma og stóraukinni tíðni á Kjalarnesi.

Fram kemur í tilkynningu frá Strætó að á annatíma aukist tíðni leiða 3, 5, 6 og 12 úr 15 mínútum í 10. Leiðir 19, 21 og 24 fara úr 30 mínútna tíðni á annatíma og í 15 mínútna tíðni.

Utan annatíma mun tíðni leiða 3, 5, 12 og 15 aukast úr 30 mínútum í 15. Þar að auki verður lengri þjónustutími á kvöldin á leiðum 1, 2, 3, 4, 5, 6, 7, 11, 12, 15, 18, 19 og 21.

Tekið er fram að vegna aukinnar tíðni muni vagnar ekki bíða eftir hver öðrum á annatíma í Ártúni. Nánari upplýsingar og nýjar tímatöflur leiða má finna á heimasíðu Strætó.