Um­deildur VAR-dómur á Brúnni

Chelsea og Crystal Palace gerðu markalaust jafntefli á Stamford Bridge í 1. umferð ensku úrvalsdeildarinnar í dag.

Þrátt fyrir að vera orðaður við brottför frá Palace var Eberechi Eze í byrjunarliðinu í dag og hann skoraði með föstu skoti beint úr aukaspyrnu á 16. mínútu. Markið var hins vegar dæmt af vegna brots Marcs Guéhi, fyrirliða Palace.

Chelsea, sem varð heimsmeistari félagsliða í sumar, ógnaði ekki mikið í leiknum í dag og Dean Henderson átti nokkuð náðugan dag í marki Palace. Varamaðurinn Liam Delap átti eina skot heimamanna á markið í leiknum.

Bikarmeistarar Palace spiluðu sterkan varnarleik og fara væntanlega nokkuð sáttir með eitt stig heim í hýði.

Næsti leikur Chelsea er gegn West Ham United á útivelli á föstudaginn. Daginn áður mætir Palace Fredrikstad frá Noregi á heimavelli í forkeppni Sambandsdeildarinnar.