Hjólhestur hjá Palhinha og markaveisla hjá Skjórunum

Tottenham - Doncaster 3-0

Tottenham tók forystuna eftir tæpan stundarfjórðung með frábæru marki. Joao Palhinha skoraði með hjólhestaspyrnu þegar gestunum mistókst að hreinsa boltann burt eftir hornspyrnu.

Skömmu síðar fékk Jay McGrath fasta fyrirgjöf í sig og varð fyrir því óláni að setja boltann í eigið net.

Svo dró ekki aftur til tíðinda fyrr en í uppbótartíma þegar Brennan Johnson skoraði þriðja markið fyrir Tottenham eftir stoðsendingu Lucas Bergvall.

Huddersfield - Manchester City 0-2

Manchester City sótti 2-0 sigur, að miklu leiti þökk sé Phil Foden. Hann skoraði snemma eftir samspil við Divine Mukasa, sem tókst að leggja upp mark í sínum fyrsta leik fyrir félagið. Foden lagði svo annað markið upp fyrir Savinho í seinni hálfleik.

Newcastle - Bradford 4-1

Ríkjandi meistarar Newcastle unnu öruggan 4-1 sigur gegn Bradford á St. James‘ Park. Brasilíumaðurinn Joelinton skoraði fyrsta markið. Samlandi hans og makker á miðjunni, Bruno Guimares, lagði annað markið upp fyrir danska framherjann William Osula.

Brasilíumennirnir tengdu síðan saman í þriðja markinu, þegar Guimares lagði upp fyrir Joelinton, sem var að skora tvennu í fyrsta sinn í fimm ár.

Andy Cook minnkaði muninn fyrir Bradford en hann er uppalinn hjá Newcastle.

William Osula skoraði svo fjórða markið, og sitt annað í leiknum, til að gera algjörlega út af við leikinn.