Fyrr­verandi banka­stjóri nýr for­stjóri Thor landeldis

Í tilkynningu segir að hann muni stjórna áframhaldandi uppbygginu laxeldisstöðvar fyrirtækisins í Þorlákshöfn. Steinþór sé reyndur stjórnandi með viðamikla reynslu í íslensku og alþjóðlegu viðskiptalífi. Síðustu ár hafi hann starfað sem sjálfstæður ráðgjafi en var áður meðeigandi hjá KPMG og bankastjóri Landsbankans.

Steinþór er með Cand. Oecon. gráðu frá Háskóla Íslands og MBA frá Edinborgarháskóla. Ásamt því að hafa verið ráðgjafi og meðeigandi KPMG og bankastjóri Landsbankans var hann framkvæmdastjóri hjá Actavis, bæði á Íslandi og erlendis.

„Það eru gríðarleg tækifæri í landeldi á laxi og sérstaklega hér á Íslandi þar sem aðstæður eru einstakar,“ er haft eftir Steinþóri. „Það er ákveðinn vendipunktur fram undan í starfsemi Thor landeldis. Að baki er vönduð undirbúningsvinna sem gerir fyrirtækinu kleift að sækja fram af miklum krafti næstu misseri. Mér finnst spennandi að taka þátt í þeirri uppbyggingu ásamt því góða teymi sem hefur komið félaginu á þennan stað.“

Ný seiðastöð opnuð

Ný seiðastöð var tekin í notkun í maí síðastliðnum þegar fyrstu hrognin voru sett í hrognaskápa og seiðin eru vel á legg komin. Framkvæmdir við eldisstöðina hófust í júlí í fyrra og mun hún geta framleitt allt að fjórar milljónir seiða á ári.

„Uppbygging Thor landeldis hefur staðist væntingar og áætlanir undir stjórn núverandi stjórnendateymis. Búið er að fjármagna fyrsta áfanga áframeldisstöðvar sem mun hafa árlega framleiðslugetu upp á 4.750 tonn,“ segir Jónas Engilbertsson stjórnarformaður Thor. Hann segir Steinþór Pálsson vera öfluga viðbót við teymið, enda búi hann að viðamikilli reynslu af uppbyggingu fyrirtækja hér heima og erlendis. „Með ráðningu Steinþórs styrkjum við teymið enn frekar og erum sannfærð um að framhaldið verði farsælt.“

Áframeldi hefst á næsta ári

Gert er ráð fyrir að fyrstu seiðin fari í áframeldi sumarið 2026 hjá Thor og er langtímamarkmið fyrirtækisins að framleiða allt að 20 þúsund tonn af laxi árlega. Thor tryggði sér 4 milljarða króna fjármögnun frá núverandi hluthöfum í apríl með IS Haf fjárfestingar sem kjölfestufjárfesti og er því vel fjármagnað til áframhaldandi vaxtar.

Jónatan Þórðarson framkvæmdastjóri fiskeldis og Þórður Þórðarson lögfræðingur mynda framkvæmdastjórn Thor landeldis ásamt Steinþóri Pálssyni. Halldór Ragnar Gíslason, sem gegnt hefur stöðu framkvæmdastjóra, hefur sagt starfi sínu lausu en mun vera nýjum forstjóra til ráðgjafar fyrst um sinn. Halldóri eru þökkuð vel unnin störf við uppbyggingu og stofnun félagsins og óskar stjórn honum velfarnaðar í komandi verkefnum.