Weerasethakul og Corbijn hlutu heiðurs­verð­laun RIFF

Leikstjórinn Rúnar Rúnarsson veitti Weerasethakul verðlaunin og sagði í ræðu sinni að kvikmyndir Apichatpong væru ólíkar annarri kvikmyndalist. Hliðstæður mætti þó finna á milli íslenkrar kvikmyndagerðar og tælenskrar, þrátt fyrir fjarlægðina milli landanna tveggja.

Weerasethakul hélt janframt meistaraspjall fyrir fullum sal í Háskólabíói í gær í kjölfar sýningar á Memoria, stórmynd leikstjórans frá árinu 2021 með Tildu Swinton í aðalhlutverki. Apichatpong sagði um RIFF og kvikmyndahátíðir almennt að þar geti myndast tengsl og fólk fái svör við spurningum lífsins.

Apichatpong fæddist í Bangkok árið 1970 og ólst upp í norðausturhluta Taílands þar sem hann lærði arkitektúr áður en hann hélt til Chicago í kvikmyndanám. Þar þróaði hann sinn einstaka stíl sem snýst um minningar, tilfinningar og andlega leit frekar en hefðbundinn, línulegan söguþráð. 

Myndir Apichatpong virðist ópólitískar við fyrstu sýn en endurspegla oft undirliggjandi átök: ritskoðun, félagslegt taumhald og bælda sögu Taílands. Hann miðlar fremur með stemningu en yfirlýsingum — kvikmyndir hans líkjast oft óljósum draumum.

Corbijn heiðraður á Bessastöðum

Forseti Íslands, Halla Tómasdóttir, afhenti hollenska leikstjóranum og ljósmyndaranum Anton Corbijn heiðursverðlaun RIFF á Bessastöðum um helgina að viðstöddum þátttakendum á kvikmyndahátíðinni og aðstandendum hennar.

Corbijn er meðal annars þekktur fyrir tónlistarmyndbönd sín, ljósmyndir, heimildarmyndir og leiknar kvikmyndir. Sigurjón Sighvatsson kvikmyndagerðarmaður flutti tölu þar sem hann fjallaði vítt og breitt um feril listamannsins. 

Við þetta tækifæri minntist forseti sérstaklega á dýrmætt samstarf Corbijns við eina af uppáhaldshljómsveitum hennar, U2, en það hefur staðið yfir undanfarin fjörutíu ár.