Golf

Sló golfhögg með krókódíl rétt fyrir aftan sig

Óskar Ófeigur Jónsson skrifar
Vince Whaley stóð i vatninu og sló höggið þrátt fyrir að það væri krókódíll syndandi rétt hjá honum.
Vince Whaley stóð i vatninu og sló höggið þrátt fyrir að það væri krókódíll syndandi rétt hjá honum. Getty/Jonathan Bachman/EPA/CRISTOBAL HERRERA

Bandarískur kylfingur sýndi að flestra mati mikið hugrekki á golfmóti í Bandaríkjunum um helgina.

Vince Whaley lenti í vandræðum á Sanderson Farms-mótinu sem fór fram í Jackson í Mississippifylki.

Kúlan hans endaði við bakkann á tjörn á elleftu holu og Whaley þurfti að fara ofan í vatnið til að slá kúluna aftur inn á braut.

Whaley bretti upp buxnaskálmarnar og óð út í vatnið. Þegar betur var að gáð þá synti þar krókdíll og fylgdist vel með öllum hans hreyfingum.

Whaley var auðvitað ekki alveg sama og leitaði ráða hjá reynslumiklum dómara. Sá hinn sami sagði Whaley ekki að hafa áhyggjur því þetta væri nú bara „krókódílakrakki“.

Whaley lét því vaða aftur ofan í vatnið og sló höggið inn á brautina á meðan krókódíllinn synti rétt fyrir aftan hann.

Whaley gerði síðan vel í að bjarga parinu á þessari elleftu holu. Hann endaði mótið á fimm höggum undir pari og varð í þriðja sæti.

Það má sjá atvikið hér fyrir neðan.




Fleiri fréttir

Sjá meira


×