Magga Stína hand­tekin í nótt af Ísraels­her

Á Instagram-síðu Frelsisflotans segir að þyrlur hafi meðal annars verið notaðar til að komast um borð skipanna, en þar má einnig sjá myndbönd frá áhafnarmeðlimum, þar með talið Möggu Stínu, þar sem hún segir að hún sé sjálfboðaliði um borð í skipinu og að ef fólk sé að horfa á myndbandið þá sé Ísraelsher búinn að ræna þeim.

„Ég biðla til allra vina minna, fjölskyldu og félaga að þrýsta á íslensk stjórnvöld að krefjast lausnar minnar nú þegar og þrýsta á íslensk stjórnvöld að slíta stjórnmálastarfi,“ segir hún.

Í ákalli frá fjölskyldu Möggu Stínu segir að áhafnarmeðlimum sé nú siglt yfir til Ashdod-hafnar í Ísrael og að þau hafi misst allt samband við hana og aðra skipverja.

„Við fjölskyldan biðlum til íslenskra stjórnvalda að beita sér með öllum mætti fyrir því að ísraelsk yfirvöld leysi hana úr haldi tafarlaust, sem og aðra í áhöfn Frelsisflotans,“ segir í ákallinu.

Misstu samband um klukkan fimm í nótt

Salvör Gullbrá, dóttir Margrétar, segir að fjölskyldan hafi fengið að vita af handtökunni í gegnum frelsisflotann og samfélagsmiðla og að áhafnarmeðlimir hafi verið numdir á brott. Ferðin var skrásett á bæði Instagram og YouTube og því í raun hægt að sjá þegar Ísraelsher fer um borð, segir Salvör í samtali við fréttastofu.

„Þannig fáum við þessar upplýsingar sirka svona fimm í morgun, eitthvað svoleiðis, og svo missum við allt samband við fólkið á bátnum og erum í rauninni ekki með neitt samband við móður mína, Möggu Stínu, eða neinn skipverja eins og er.“

Hún segir fjölskylduna óska þess að íslensk yfirvöld bæði fordæmi handtökurnar og kalli eftir því að öllum áhafnarmeðlimum verði sleppt. Frelsisflotinn hafi verið í löglegum og friðsamlegum erindagjörðum og tilgangur þeirra hafi verið að koma neyðaraðstoð inn á Gasa.

„Það er mjög mikilvægt, við erum að tala um lækna, blaðamenn, friðarsinna. Þetta er allt fólk í friðsamlegum erindagjörðum sem er að reyna að koma neyðaraðstoð inn á svæði þar sem ríkir hungursneyð. Það að ræna því fólki um miðja nótt og færa það í ísraelsk fangelsi stenst ekki neina skoðun,“ segir Salvör.

Hún segir borgaraþjónustuna vinna að því að fá upplýsingar um stöðu Möggu Stínu.

Utanríkisráðuneytið fylgist með

Í tilkynningu frá utanríkisráðuneytinu segir að þeim sé kunnugt um að ísraelsk stjórnvöld hafi í dag farið um borð í skipið, Conscience, sem sigldi áleiðis í áttina til Gasa. Í tilkynningunni er það áréttað sem kom fram fyrr í vikunni að íslensk stjórnvöld hafi látið ísraelsk stjórnvöld vita að Íslendingur væri um borð og þau hvött til að virða bæði alþjóðalög og mannréttindi þeirra sem voru um borð.

„Utanríkisráðuneytið er í samskiptum við þar til bæra aðila til að veita viðkomandi einstaklingi borgaraþjónustu og hefur enn fremur verið í sambandi við aðstandendur viðkomandi. Áfram verður fylgst með málinu,“ segir að lokum í tilkynningunni.

Ísrael segir tilraunina tilgangslausa

Fjallað er um handtökurnar á bæði Guardian og Al Jazeera. Á vef Guardian segir að utanríkisráðuneyti Ísraels hafi staðfest að hafa stöðvað bátana og sagt að allir um borð yrðu fluttir til hafnar og svo vísað úr landi. Í tilkynningu segir ráðuneytið þetta enn eina tilgangslausu tilraunina til að rjúfa herkví og komast inn á átakasvæði. Þá segir einnig að allir farþegar skipanna séu við góða heilsu og að þeim verði fljótlega vísað úr landi.

Blaðamenn og heilbrigðisstarfsmenn um borð

Um borð í The Conscience, skipinu sem Margrét Kristín sigldi með, voru hátt í hundrað heilbrigðisstarfsmenn, blaðamenn og friðarsinnar sem vildu reyna að koma neyðaraðstoð og heilbrigðisstarfsfólki til íbúa Gaza. Um borð voru nauðsynjar á borð við lyf, hjúkrunarvörur og mataraðstoð upp á þrettán milljónir króna samkvæmt ákalli fjölskyldu Möggu Stínu.

„Ísrael stendur engin ógn af þeim skipum sem sigla undir merkjum Frelsisflotans. Engu að síður hafa ísraelsk stjórnvöld gert skipin sem á undan sigldu upptæk með ofbeldi og ógnunum, rænt skipverjum og fargað matvælum og lyfjum sem um borð voru. Fréttir bárust í kjölfarið af illri meðferð Ísraels á fólkinu sem haldið er í Ktzi’ot-fangelsinu. Þeim hefur verið misþyrmt, neitað um næringu, vatn, svefn og lífsnauðsynleg lyf tekin af þeim. Mannréttindi þeirra eru virt að vettugi, rétt eins og Ísrael hefur virt mannréttindi palestínsku þjóðarinnar að vettugi allt frá byrjun hernáms og þjóðarmorðs Ísraels í Palestínu,“ segir í ákalli fjölskyldunnar og að þau hafi því miklar áhyggjur af henni og þeirri meðferð sem hún gæti hlotið í haldi Ísraela.

Skora á stjórnvöld að bregðast við

„Við skorum á íslensku ríkisstjórnina og almenning að fordæma ólöglega handtöku Ísraela á almennum borgurum og krefjast þess að allir sjálfboðaliðar verði látnir lausir tafarlaust,“ segir í ákallinu.

Undir það rita Elsa María Blöndal, Salvör Gullbrá Þórarinsdóttir og Sólveig Hauksdóttir en þær eru systir, dóttir og móðir Möggu Stínu.

Aðgerðasinnum vísað úr landi

Fyrr í þessari viku var um 170 aðgerðasinnum vísað frá Ísrael eftir að hafa farið í sama leiðangur. Greta Thunberg var ein þeirra. Þau voru send til Grikklands og Slóvakíu eftir að hafa verið í haldi í um þrjá eða fjóra daga. Eftir að þau losnuðu úr haldi lýstu þau slæmri meðferð í haldi í Ísrael, sem ísraelsk stjórnvöld hafa neitað með öllu. 

Fréttin hefur verið uppfærð.