Far­þegum fjölgaði um 14 prósent í október

Þetta kemur fram í tilkynningu frá Icelandair til Kauphallar. Þar segir að í mánuðinum hafi 37 prósent farþega verið á leið til Íslands, 20 prósent frá Íslandi, 38 prósent voru tengifarþegar og 5 prósent ferðuðust innanlands. 

„Sætanýting nam 85,0% og stundvísi var 81,4%, sem er lækkun um 3,1 prósentustig samanborið við síðasta ár, vegna mikillar snjókomu í lok mánaðarins sem olli umtalsverðum röskunum á flugi til og frá Keflavíkurflugvelli yfir tveggja daga tímabil. Það sem af er ári hafa 4,4 milljónir farþega flogið með Icelandair, sem eru 8% fleiri en á sama tímabili í fyrra,“ segir í tilkynningunni.

Farþegum virðist því fjölga og töluverður vöxtur hjá félaginu sem sagði upp 38 starfsmönnum á skrifstofu á þriðjudaginn. Bogi Nils Bogason forstjóri skammaði ríkisstjórnina vegna stöðu sem komin væri upp í ferðaþjónustu og sagði ríkisstjórnina þurfa að fara í þveröfuga átt við fyrri plön.

Leiguflugsstarfsemin hélt áfram að vaxa með 25% aukningu í seldum blokktímum á milli ára. Fraktflutningar, mældir í tonnkílómetrum, drógust saman um 22% en samdrátturinn í fluttum tonnum nam 11% og skýrist munurinn þar á milli af breytingu á markaðssamsetningu. Flutt magn hefur dregist saman á lengri leiðum til Norður-Ameríku, á meðan innflutningur hefur aukist um 12% á styttri leiðum frá Evrópu. Kolefnislosun á hvern tonnkílómetra dróst saman um 4%, vegna hærra hlutfalls eyðslugrennri flugvéla í flotanum,“ segir í tilkynningunni.

Vilja jafna árstíðasveiflu

Haft er eftir Boga Nils forstjóra að farþegum hafi fjölgað umtalsvert í október sem sé í takt við áherslu félagsins á að vaxa utan háannar og þannig jafna árstíðasveiflu í rekstrinum. 

„Það er einnig mjög ánægjulegt að sjá að áherslur okkar á markaðina til og frá landinu halda áfram að skila árangri.

Stundvísi var góð framan af október en mikil snjókoma í lok mánaðarins gerði það að verkum að stundvísi minnkaði milli ára. Ég vil þakka starfsfólki félagsins sem lögðust öll á eitt við erfiðar og óvenjulegar aðstæður á þessum árstíma. Því miður neyddumst við til þess að aflýsa fjölda flugferða vegna þessara aðstæðna.

Í mánuðinum kynntum við Miami í Flórída sem nýjan áfangastað og er það í takt við áherslur okkar á að auka flug yfir vetrartímann til áfangastaða sem eru vinsælir utan okkar háannatíma. Miami er spennandi áfangastaður fyrir Íslendinga og aðra Evrópubúa en jafnframt sjáum við mikil tækifæri í að kynna flug til Íslands og áfram til Evrópu fyrir fólki í suðurhluta Flórída,“ segir Borgi Nils.