Lárus gafst upp og hætti að horfa: „Þeir hentu þeim leik“

Úkraína tapaði 4-0 á útivelli fyrir Frakklandi síðasta fimmtudag á meðan að Ísland vann 2-0 sigur gegn Aserbaísjan í Bakú.

Að mati Lárusar voru Úkraínumenn allan tímann með hugann við það að vera í sem bestu ástandi fyrir leikinn við Ísland í dag.

„Það er stutt á milli leikja, sex tíma flug á milli staða [hjá íslenska hópnum], þrír tímar í tímamismun… Á meðan gerir Úkraína sex breytingar á byrjunarliðinu,“ benti Lárus Orri á í beinni útsendingu á Sýn Sport.

Lárus sagði ekkert að marka síðasta leik Úkraínu, við Frakkland:

„Ég fór heim til að horfa á hann og ég hætti bara. Þeir gáfu bara leikinn. Ég held að XG-ið þeirra hafi verið núll. Þeir hentu þeim leik, í raun og veru. Þetta er leikurinn þeirra, í þessum glugga, þannig að þeir eru auðvitað með forskot þarna. En þegar kemur út í svona stóra leiki þá kannski skiptir það ekki máli.“

Leikur Úkraínu og Íslands er í opinni dagskrá á Sýn Sport og hefst klukkan 17.