Fjöldi er­lendra far­þega stendur í stað en Ís­lendingum fækkar

„Það er ljóst að það er stöðug og mikil eftirspurn eftir því að heimsækja Ísland. Það birtist í því að við gerum ráð fyrir álíka mörgum erlendum gestum á næsta ári og við höfum tekið á móti undanfarin ár. Brotthvarf Play hefur auðvitað haft áhrif á framboð á flugi en með markvissri vinnu hefur þó tekist að lágmarka þau, sérstaklega þegar kemur að erlendum gestum,“ er haft eftir Grétari Máa Garðarssyni, forstöðumanni flugfélaga og markaðsmála á Keflavíkurflugvelli, í fréttatilkynningu um farþegaspá næsta árs.

Önnur félög að mestu hlaupið í skarðið fyrir Play

Þar segir að farþegaspá KEF fyrir 2026 geri ráð fyrir að 7,51 milljónir farþega fari um flugvöllinn á næsta ári samanborið við 8,12 milljón árið 2025. Það sé 7,4 prósenta fækkun á heildarfjölda farþega á milli ára, 8,1 prósents yfir sumarmánuðina og 6,0 prósenta yfir vetrarmánuðina. Þar muni mestu að tengifarþegum fækkar um 15,3 prósent og að gert sé ráð fyrir 13,2 prósenta samdrætti á ferðum Íslendinga til útlanda. Brottfarar- og komufarþegum fækki hins vegar mun minna eða um 4,5 prósent.

„Unnið hefur verið markvisst að því að fylla það skarð sem Play skildi eftir sig en félagið var okkar næststærsta flugfélag. Þó að það hafi ekki enn tekist að fullu sjáum við ýmis jákvæð merki. Til dæmis ef við berum spána saman við rauntölur 2025 án Play sjáum við 5,3 prósenta fjölgun heildarfarþega á milli ára. Það sýnir að öðrum flugfélögum gengur vel að fylla í skarðið,“ er haft eftir Grétari Má.

Ferðamönnum fækkar lítillega

Ferðamannaspá KEF horfi bæði til erlendra ferðamanna sem heimsækja Ísland og Íslendinga sem fara erlendis um Keflavíkurflugvöll. Gert sé ráð fyrir að 2,24 milljónir erlendra ferðamanna heimsæki Íslandi árið 2026 samanborið við 2,27 milljónir á þessu ári, sem sé 1,2 prósenta fækkun á milli ára. Utanlandsferðum Íslendinga muni hins vegar að öllum líkindum fækka töluvert árið 2026. Þær séu áætlaðar 602 þúsund en þær séu 693 þúsund á árinu sem er að líða, sem sé 13,2 prósenta fækkun á milli ára.

„Það er mjög jákvætt að fjöldi erlendra ferðamanna helst nær óbreyttur. Það er kominn mikill stöðugleiki í fjölda þeirra undanfarin ár, en frá árinu 2023 hefur hann verið á bilinu 2,2 til 2,3 milljónir á ári.“ 

Yfir sumarmánuðina muni 27 flugfélög fljúga áætlunarflug til áttatíu áfangastaða og tuttugu til 65 áfangastaða yfir vetrarmánuðina. Þegar liggi fyrir að tvö ný flugfélög, Alaska Air og Air Transat, muni hefja áætlunarflug til KEF á nýju ári. Þá bætist við fimm tengingar í Norður-Ameríku og sex í Evrópu. Áætlað sé að hlutfall tengifarþega verði 25 prósent, sem sé nokkuð minna en verið hefur undanfarin ár.