FDA sam­þykkir tvö ný lyf gegn ónæmum lekandabakteríum

Samkvæmt Alþjóðaheilbrigðisstofnuninni hefur ónæmi lekanda baktería gegn þeim tveimur lyfjum sem helst eru notuð gegn sjúkdómnum, ceftriaxone og cefixime, aukist úr 0,8 prósent í 5 prósent  fyrir fyrrnefnda og úr 1,7 prósent í 11 prósent fyrir síðarnefnda á árunum 2022 til 2024.

Nuzolvence, sem inniheldur virka efnið zoliflodacin, var samþykkt af FDA þann 12. desember síðastliðinn og þá hefur stofnunin einnig samþykkt notkun gepotidacin, sem hingað til hefur verið notað gegn þvagfærasýkingum, gegn lekanda.

Bæði lyf hafa reynst vel gegn ónæmum lekanda bakteríum en zoliflodacin reyndist virka í 90 prósent tilvika; jafnvel og sú meðferð sem hefur verið algengust hingað til, sem hefur falið í sér sprautu af ceftriaxone og azithromycin í töfluformi.

Zoliflodacin var þróað af samtökunum Global Antibiotic Research & Development Partnership í samstarfi við lyfjafyrirtækið Innoviva. Samkvæmt skilmálum samstarfsins má GARDP skrá og framleiða lyfið í öllum lágtekjuríkjum heims, flestum miðtekjuríkjum og nokkrum hátekjuríkjum.