Breiða­blik leitar að leik­mönnum en reglur UEFA flækja málin

„Við getum orðað það þannig, það er nóg að gera“ sagði Ian Jeffs, sem tók við þjálfarastarfinu hjá Breiðabliki í haust og hefur þurft að sinna miklum skrifstofustörfum samhliða því að koma sínu handbragði á liðið. 

„Þetta er ákveðið hrós fyrir stelpurnar og Breiðablik, að þessar stelpur séu að fara frá félaginu í atvinnumannadeildir í Evrópu. Þetta er gott og slæmt. Gott fyrir leikmennina en kannski ekki jafn gott fyrir okkur í þjálfarateyminu, að missa þessa leikmenn“ bætti Jeffs við en viðtal við hann úr Sportpakka Sýnar í gærkvöldi má sjá hér fyrir neðan.

Tækifæri fyrir unga leikmenn

Leikmennirnir sem hafa farið voru líka engir aukaleikarar. Tvær landsliðskonur, þrír bandarískir atvinnumenn, sú stoðsendingahæsta í Bestu deildinni og sú besta í Bestu deildinni á síðasta tímabili hafa vitjað nýrra ævintýra erlendis.

„Við erum að vinna á fullu í leikmannamálum og erum að reyna að fá gæða leikmenn inn til að koma í staðinn fyrir þessa leikmenn sem hafa farið frá okkur. Við erum í mikilli skrifstofuvinnu við þetta núna, en svo koma líka bara ákveðin tækifæri fyrir ungar stelpur sem geta tekið næsta skref og fengið stærra hlutverk í meistaraflokksliðinu í sumar.“

Evrópuleikur eftir minna en mánuð 

Næsti leikur liðsins er eftir minna en mánuð og er ekki af minni gerðinni. Breiðablik mætir Svíþjóðarmeisturum BK Hacken í átta liða úrslitum Evrópubikarsins þann 11. febrúar.

Félagaskiptaglugginn hér innanlands opnar hins vegar ekki fyrr en 5. febrúar, þannig að ef Blikarnir ætluðu að sækja leikmenn úr öðrum íslenskum liðum er tíminn knappur. 

Svo er regluverk evrópska knattspyrnusambandsins að flækjast aðeins fyrir Blikunum.

„Þetta eru bara reglur hjá UEFA. Við megum bara taka þrjá nýja leikmenn inn í hópinn frá því í síðasta leik. Við þurfum bara að sjá hvernig það þróast og hvað við verðum með stóran hóp.“