„Mjög á­huga­verð um­ræða“

Verðbólga hefur ekki mælst meiri frá því í september 2024 og stendur í fimm komma tveimur prósentum. Peningastefnunefnd Seðlabankans kynnir vaxtaákvörðun á miðvikudag en reiknað er með óbreyttum vöxtum eða hækkun um 0,25 prósentustig.

Það sem hafði mest áhrif á vísitölu neysluverðs voru breytingar á vörugjöldum bifreiða og upptaka nýs kílómetragjalds.

Fjármálaráðherra vísaði því á bug í gær að aukningin skýrðist af gjaldhækkunum ríkisstjórnarinnar vegna kílómetragjalds og sagði olíufélög bera ábyrgð vegna aukinnar álagningar. Forsætisráðherra tók undir það að loknum ríkisstjórnarfundi í morgun og sagði ríkisstjórnina hafa búist við frekari lækkun á eldsneytisverði.

„Þannig að ég set að hluta til ábyrgðina á olíufélögin. Hvað það varðar að passa sig þegar það kemur að verðlagningu. Ég veit að þau finna hitann af því.“

Í úttekt frá ASÍ sem kom út fyrr í mánuðinum segir að álagning olíufélaganna hafi aldrei verið hærri. Að þeirra mati ætti olíuverð að lækka enn frekar.

 Forstjóri N1 sagði í yfirlýsingu í dag að verð hafi verið lækkað meira en sem nemur niðurfellingu gjalda og að framsetning ríkisstjórnarinnar væri villandi. Álagning þeirra hafi ekki aukist.

Guðrún Ragna Garðarsdóttir, framkvæmdastjóri Atlantsolíu, sagði í samtali við fréttastofu að málflutningur ríkisstjórnarinnar standist ekki skoðun og sagði það óábyrgt að slengja því fram að olíufélögin beri ábyrgð á verðbólgunni án þess að hafa gögn því til stuðnings.

Auður Daníelsdóttir, forstjóri Dranga sem á og rekur Orkuna, segir félagið alltaf keppast við að hafa verðið sem lægst.

„Þetta er náttúrulega mjög áhugaverð umræða að fylgjast með. Auðvitað er þetta stórt mál fyrir okkur öll í þessu samfélagi. Bæði fyrir atvinnulífið og samfélagið í heild. Það sem snýr að Orkunni þá er verðið það sama á dælu og það var fyrir áramót. Að sjálfsögðu skiluðum við öllum þeim gjöldum sem voru lögð af um áramótin. Við stöndum á alveg sama stað og við gerðum fyrir áramót.“