Líkurnar á lækkun „mjög litlar“

„Ég ætla ekki að fara að giska á hvað stefnunefnd mun gera, en ég get tekið undir það sjónarmið að líkurnar á lækkun núna á næsta fundi eru mjög litlar,“ sagði Daði Már á Sprengisandi í dag. Hann áréttir þó að Seðlabankinn horfi á heildarhagkerfið og þó það hljómi eins og þversögn þýði stýrivextir að hægt sé að gera mjög mikið til að örva hagkerfið.

Í vikunni var greint frá því að verðbólga mælist nú 5,2 prósent, umfram svörtustu spár. Daði Már hefur sætt gagnrýni vegna ýmissa hækkana sem gerðar voru á opinberum gjöldum um áramótin. Margar þeirra tengjast ökutækjum. Þá hefur hann sætt gagnrýni fyrir að kenna olíufélögunum um aukna verðbólgu.

Peningastefnunefnd Seðlabankans kynnir ákvörðun sína næsta miðvikudag. Greiningardeildir Íslandsbanka og Landsbanka eru ósammála í spám sínum um stýrivaxtaákvörðun Seðlabankans. Íslandsbanki spáir óbreyttum stýrivöxtum en Landsbankinn spáir 0,25 prósentustiga hækkun. 

Á Sprengisandi ítrekaði Daði Már að hann harmi að ekki hafi gengið betur að ná niður vöxtum en raun ber vitni.

„Ég er ekki ánægður. Og það er alls ekki að ég sé að standa mig nógu vel í vinnunni,“ segir Daði.

Hann viðurkennir sem fyrr að hafa gagnrýnt hagræðingaraðgerðir fyrri ríkisstjórna, en í þeim fólust meðal annars óútfærðar afkomubætandi aðgerðir.

„Við nálguðumst þetta allt öðruvísi, með því að leita til almennings og setja síðan saman svona möppu af aðgerðum sem á tímabili fjármálaáætlunar eiga að skila tæplega 110 milljörðum,“ segir Daði. 

Hann segir vel hafa gengið að skera niður enn sem komið er og bendir á að í fyrra hafi tekist að draga saman kostnað ríkisins um fimmtán prósent.

„Það sem er auðvitað líka ljóst er á sama tíma, tekur þessi ríkisstjórn við raunverulega með það verkefni og umboð að hreyfa við ákveðinni kyrrstöðu sem hafði ríkt, koma orkuöflun aftur af stað, vinna úr innviðaskuldinni.“