Tárin flæddu þegar Leer­dam tróð upp í gagn­rýn­endur

Skautahöllin í Mílanó var stappfull af fólki sem sá Leerdam ná ótrúlegum hraða og tryggja sér Ólympíugull.

Tilfinningarnar voru augljóslega miklar og tárin streymdu niður kinnar Leerdam sem hefur verið úthúðað í aðdraganda leikanna og sögð haga sér eins og díva, með því til dæmis að ferðast með einkaþotu.

Athyglin á Leerdam er enn meiri en ella vegna sambands hennar við YouTube-stjörnuna og boxarann Jake Paul sem tugir milljóna fylgja á samfélagsmiðlum.

Paul og fjölskylda Leerdam voru að sjálfsögðu í Mílanó í gærkvöld og tárin voru ekkert færri hjá þeim þegar þau urðu vitni að Leerdam vinna sitt fyrsta Ólympíugull, eftir að hafa fengið silfur í sömu grein fyrir fjórum árum.

Norski ríkismiðillinn NRK spurði Leerdam hvernig hefði verið að hafa sitt fólk til að fagna með á þessari stundu:

„Það hefur alla þýðingu fyrir mig. Þau vita hversu mikla vinnu ég legg á mig og hversu mikið ég hef grátið. Alla pressuna sem ég hef sett á sjálfa mig og undirbúninginn fyrir þetta augnablik. Allt sem ég hef lagt í þessa íþrótt. Ég trúi þessu ekki,“ sagði Leerdam.

Paul var augljóslega stoltur af sinni konu og skrifaði á Twitter: Juttttttttttaaaaaaaa. Ég get ekki hætt að gráta. Þú kláraðir þetta, ástin. Ólympíugull. Guð er stór og það ert þú líka.“ Hann bætti svo við: „Við vorum að verða vitni að einu mikilvægasta íþróttaaugnabliki sögunnar. Gögnin munu sýna það. Ég get ekki lýst því hversu stoltur ég er.“