Birna fékk skelfi­legar fréttir og þarf að hætta

Birna greindi frá þessu á Facebook-síðu sinni í dag en þessi sigursæla landsliðskona úr Keflavík hefur verið afar óheppin með meiðsli sem nú verða þess valdandi að hún þarf að draga sig í hlé.

Birna hafði verið einn allra besti leikmaður efstu deildar hér á landi þegar hún sleit krossband í hné vorið 2024. Þessi meiðsli hafa reynst enn alvarlegri og erfiðari viðureignar en búist var við.

„Körfubolti hefur verið risastór hluti af lífi mínu síðan ég var 5 ára. Eins og margir vita sleit ég krossband í maí 2024 og hef síðan þá farið í þrjár aðgerðir á hnénu. Eftir síðustu aðgerð fékk ég þær fréttir að skaðinn væri alvarlegri en áður var talið og að mjög ólíklegt sé að ég muni stíga aftur á parketið,“ skrifaði Birna á Facebook.

„Verandi þrjósk og ákveðin ætla ég þó ekki að útiloka neitt í framtíðinni – en þetta er staðan í dag. Eðlilega er þetta mikið áfall og mun taka tíma fyrir mig að vinna úr þessu. Næstu mánuðir fara í endurhæfingu og ég held áfram að taka þetta einn dag í einu,“ bætti hún við.

Birna spilaði síðast tímabilið 2023-24 og var þá með 14,2 stig og 4,2 fráköst að meðaltali í leik fyrir Keflavík. Þar spilaði hún upp alla yngri flokka og allan sinn feril hér á landi, eftir að hafa fyrst slegið í gegn þegar Keflavík vann tvöfalt árið 2017, en einnig í bandaríska háskólakörfuboltanum. Þá hefur hún einnig leikið með landsliðum Íslands.