„Þessi medalía er fyrir allar mömmurnar“

Þetta var í fimmta sinn sem Elana tekur þátt í bobbsleðakeppni á Vetrarólympíuleikunum og þar tókst henni að bæta gullmedalíu í safn sem taldi þrjú silfurverðlaun og tvö bronsverðlaun fyrir.

„Þetta sýnir ykkur bara… haldið áfram að berjast. Þetta er ótrúlega þýðingarmikið, fyrir mig, liðið mitt og alla í kringum mig“ sagði Elana, sem varð í leiðinni sigursælasta bobbsleðakona sögunnar.

Hún hefur fjórum sinnum orðið heimsmeistari á sínum ferli og skráð nafn sitt margsinnis á spjöld sögunnar, sem sigursælasta svarta konan á Vetrarólympíuleikunum og sem sigursælasta konan frá Bandaríkjunum til dæmis.

Þegar úrslitin urðu ljós féll Elana niður á hnén og hélt utan um börnin sín tvö.

„Þessi medalía er fyrir allar mömmurnar sem gátu kannski ekki látið drauma sína rætast og létu börnin breyta draumunum. Þær héldu mér gangandi og þær hafa stutt mig á erfiðu tímunum.“

Ekki einfalt fjölskyldulíf

Elana er gift fyrrum bobbsleðamanninum Nic Taylor og fjölskyldulífið er ekki einfalt á þeim bænum því yngri sonurinn er heyrnarlaus og eldri sonurinn er með Downs heilkennið.

„Börnin mín hafa fært miklar fórnir fyrir mig og það er svo margt fólk sem hefur stutt mig á leiðinni að þessari gullmedalíu. Ég hef verið með margar barnfóstrur í gegnum tíðina og þær hafa allar lagt inn svo mikla vinnu til að hjálpa börnunum mínum og eiginmanninum. Ég get ekki lýst því hversu mikið það þýðir fyrir mig, eða hversu marga þurfti til að vinna þessi verðlaun.“