Hélt að hundurinn sem hljóp inn á brautina væri úlfur

Hundurinn hljóp inn á brautina þegar tveir keppendur voru við það að koma í mark. Hundurinn hengdi sig þó á frekar slaka keppendur sem komust ekki áfram í úrslit.

„Ég var ekki beint hrædd, ég hugsaði bara: Hvur þremillinn er í gangi hérna?“ sagði Nahiara Diaz Gonzalez.

Hinn keppandinn varð þó örlítið hræddur.

„Ég hélt að þetta væri úlfur. En svo fannst mér þetta bara fyndið.“

Lýsandi útsendingarinnar hjá norska ríkissjónvarpinu var feginn að hundurinn hefði komið inn á brautina á þessum tímapunkti, í undankeppni frekar en úrslitum.

„Þetta hefði getað endað hrikalega“ sagði Jann Post.

Sumir keppendur áttuðu sig hins vegar ekkert á því að eitthvað hefði komið upp á.

„Var einhver annar hundur í brautinni heldur en ég? Ég fattaði það ekki. Ég var svo einbeitt“ sagði Julie Bjervig Drivenes, sem keppir fyrir hönd Noregs.