Búin í að­gerð og ber sig vel eftir að hafa fengið skauta í augað

Í átta manna úrslitum í 1500 metra skautahlaupi í Mílanó lenti Sellier í árekstri við hina bandarísku Kristen Santos-Griswold og Ariönnu Fontana frá Ítalíu. Skauti Santos-Griswold fór undir auga Selliers svo fossblæddi úr þeirri pólsku.

Sellier setti þumalinn upp í loftið þegar hún var borin af svellinu eftir slysið í gær.

Hún gekkst svo undir aðgerð í gærkvöldi og birti mynd af sér í sjúkrarúminu á Instagram í dag.

„Ég veit að einn daginn mun ég horfa á þessa mynd og muna að ég er sterkari en ég hefði nokkru sinni trúað. Takk fyrir allan stuðninginn. Ég vildi bara láta ykkur vita að ég hef það alveg ágætt,“ skrifaði Sellier við myndina. Ekki sást í hægri helming andlits hennar á myndinni.

Santos-Griswold var dæmd úr leik en Fontana komst í úrslit þar sem hún endaði í 5. sæti.