Borgaði meira en 28 milljónir króna fyrir Ólympíugallann hennar

Hollenska skautakonan klæddist gallanum þegar hún vann gull í 1.000 metra skautahlaupi og silfur í 500 metra skautahlaupi á Vetrarólympíuleikunum í Mílanó og Cortinu.

Gallinn fór á uppboð eftir að hún lauk keppni á Vetrarólympíuleikunum 2026 en boð stóðu yfir í viku.

Áritaður af Leerdam

Þegar hamrinum var slegið í borðið á laugardagsmorgun greiddi einn bjóðandi 230.441 Bandaríkjadali fyrir keppnisgallann, sem er áritaður af Leerdam og hafði verið til sýnis í Staatsloterij Team NL House í Mílanó á meðan leikunum stóð. Það jafngildir meira en 28 milljónum í íslenskum krónum.

Boðin höfðu staðið í um tíu þúsund dölum í nokkra daga þar til fresturinn rann út klukkan níu á laugardagsmorgun, en þá sprakk allt. Á örfáum mínútum urðu tveir keppinautar til þess að verðið skaust upp í sex stafa tölu áður en það náði lokaupphæðinni.

Sló í gegn

Hin 27 ára gamla skautastjarna sló í gegn á Vetrarólympíuleikunum 2026 þegar hún vann sitt fyrsta Ólympíugull á ferlinum en Leerdam vakti enn meiri athygli þegar hún renndi niður rennilásnum á gallanum sínum og sýndi Nike-íþróttatopp eftir að hafa unnið

Leerdam, sem er trúlofuð YouTube-stjörnunni og hnefaleikakappanum Jake Paul, gæti að sögn hafa þénað meira en eina milljón dala, 122 milljónir króna, fyrir þennan fögnuð eftir að Nike birti mynd af hinni tilfinningaþrungnu hollensku konu á Instagram-síðu sinni.

Einn af nokkrum minjagripum

Appelsínuguli gallinn var einn af nokkrum minjagripum sem hollenska kvennaliðið í skautahlaupi hafði boðið upp á. Einnig voru boðnir upp á Match Worn Shirts-síðunni gallar sem aðrir verðlaunahafar, Femke Kok, Antoinette Rijpma-De-Jong og Merel Conjin, klæddust.

Galli Leerdam seldist þó fyrir mun meira en gallar liðsfélaga hennar, en næstdýrasti hluturinn í hópnum voru leggingsbuxur Kok sem seldust á 5.675 dali eða 692 þúsund íslenskar krónur.

Áritað ennisband Leerdam var einnig boðið upp og seldist á væna summu, 1.797 dali eða 241 þúsund krónur.

Íþróttamennirnir sjálfir fá ekkert í sinn vasa af uppboðunum, en ágóðinn rennur til þeirra félaga þar sem þau hófu feril sinn.

Á fimmtudaginn birti Leerdam hugleiðingu um tíma sinn á Ólympíuleikunum og hvað þyrfti til að komast á Vetrarólympíuleikana og ná árangri þar.

Hafði þegar sigrað í lífinu

„Áður en ég hóf þetta ferðalag hafði ég þegar sigrað í lífinu með því að hafa yndislegasta fólkið í kringum mig,“ skrifaði hún á Instagram.

„Fyrir tveimur árum ákvað ég að stofna mitt eigið lið. Það var ekki auðveld ákvörðun en ég fann að hún var rétt fyrir mig. Ég handvaldi besta fólkið á sviðinu með bestu orkuna og hjörtun.“

Leerdam þakkaði þjálfurum sínum, liðsfélögum og samstarfsaðilum utan íssins, auk fjölskyldu sinnar, fyrir stuðninginn.

Hún vottaði einnig unnusta sínum, YouTube-stjörnunni og hnefaleikakappanum Jake Paul, virðingu sína fyrir að „vera til staðar“ fyrir hana.

„Ég endaði tímabilið á toppnum“

„Takk, unnusti minn, fyrir að vera til staðar fyrir mig, fyrir að hlusta á mig tala um þessa íþrótt sem þú þekktir ekki einu sinni áður en við hittumst, á hverjum einasta degi. Fyrir að leyfa mér að vera ég og styðja mig á þessu ferðalagi. Þú ert svo ástríkur maður. Ég elska þig, Jake.“

Leerdam lauk færslunni, sem inniheldur nokkrar myndir og myndbönd frá tíma hennar á Ítalíu, með því að þakka aðdáendum sínum og fylgjendum.

„Ég endaði tímabilið á toppnum. Að verða Ólympíumeistari fullkomnar draumalistann minn. Ég er mjög sátt,“ skrifaði hún.

„Látum þetta ferðalag sem kallast lífið halda áfram og gerum næsta kafla enn fallegri. Ég vona að þið njótið öll ferðarinnar.“