Fá þrjá­tíu aukamilljónir til að fylgjast með dagvörumarkaði

Í tilkynningu á vef Stjórnarráðsins segir að á síðustu árum hafi orðið ýmsar breytingar á dagvörumarkaði og þeim fyrirtækjum sem annast sölu, framleiðslu og innflutning á dagvöru. Dagvöruverð hér sé með því hæsta sem þekkist í Evrópu og kaup á dagvöru séu einn af stærstu kostnaðarliðum heimila og þar af leiðandi stór þáttur í þróun verðbólgu. Af þessum sökum sé mikilvægt að samkeppnisaðstæður á dagvörumörkuðum, og tengdum mörkuðum sem hafa áhrif á dagvöruverð, sæti skoðun.

Framangreind ráðstöfun sé hluti af almennri viðleitni stjórnvalda til að ná niður verðbólgu og samræmist áherslum í stefnuyfirlýsingu ríkisstjórnarinnar um mikilvægi virkrar samkeppni og öfluga neytendavernd.

„Það er mikilvægt að Samkeppniseftirlitið hafi bolmagn til að fylgja eftir áherslum stjórnar eftirlitsins. Í þeim áherslum er sérstaklega fjallað um mikilvægi samkeppni á dagvörumörkuðum, m.a. flutningamarkaði og eldsneytismarkaði. Er þetta mikilvægur liður í aðgerðum stjórnvalda til að ná niður verðbólgu og til að efla virka samkeppni og neytendavernd,“ er haft eftir Hönnu Katrínu Friðriksson, atvinnuvegaráðherra.