Handa- og fóta­laus en sakaður um morð

Hinn 27 ára gamli Dayton James Webber átti sögu sem flestir myndu kalla góða og hvetjandi dæmisögu um að allt sé hægt í íþróttum og lífinu. 

Hann fékk blóðsýkingu þegar hann var tíu mánaða gamall og læknar gáfu honum aðeins þriggja prósenta lífslíkur. Hann lifði af en missti alla fjóra útlimi sína í ferlinu.

Þrátt fyrir að vera bæði hand- og fótalaus þá varð hann atvinnumaður í baunapokakasti, sá fyrsti í sögu bandarísku baunapokadeildarinnar sem er án handleggja eða fótleggja.

Hann vann fylkismeistaratitilinn í Maryland. Hann kallaði baunapokakast köllun sína og lýsti sjálfum sér sem hvatningarfyrirlesara. Hann var hylltur sem lifandi sönnun þess að hver sem er getur sigrast á hverju sem er.

Lenti í rifrildi við manninn í framsætinu

En sú saga tók nú stefnu sem enginn sá fyrir.

Að sögn lögreglustjórans í Charles-sýslu var Webber að aka með þrjá farþega um La Plata þegar hann lenti í rifrildi við manninn í framsætinu, hinn 27 ára gamla Bradrick Michael Wells. Í rifrildinu skaut Webber hann til bana.

Hann lagði þá bílnum og bað farþegana tvo í aftursætinu að hjálpa sér að draga líkið úr bílnum. Þeir neituðu, fóru út úr bílnum, gengu í burtu og veifuðu til lögregluþjóns rétt fyrir klukkan 22:30.

Ók á brott með Wells enn í bílnum

Webber ók á brott með Wells enn í bílnum. Næstum tveimur tímum síðar hringdi íbúi við Newport Church Road í Charlotte Hall í neyðarlínuna eftir að hafa fundið lík í garðinum sínum.

Lögreglan rak slóð bíls Webbers til Charlottesville í Virginíu, þar sem hún fann hann á sjúkrahúsi að leita sér lækninga vegna ótilgreinds heilsufarsvandamáls. Hann var handtekinn og bíður nú framsals til Maryland, þar sem hann á yfir höfði sér ákæru fyrir fyrsta og annars stigs morð.

Hafa ekki útskýrt hvernig hann fór að þessu

Lögreglan hefur ekki útskýrt hvernig Webber, sem er án handleggja og fótleggja, gat bæði ekið bíl og skotið af vopni. En myndband sem var hlaðið upp árið 2024 hefur farið í dreifingu á netinu, sem sýnir hann nota útlimastúfa sína til að hlaða og skjóta af skammbyssu á skotmark.