Gauti þre­faldur Ís­lands­meistari og Sonja Lí sigur­vegari stórsvigsins

„Veður var einstaklega gott og aðstæður mun betri en í sviginu í gær. Keppnin var mjög hörð og skemmtileg og oft á tíðum var mjótt á munum milli keppenda,“ segir í tilkynningu mótshaldara. 

Gauti þrefaldur Íslandsmeistari 

Gauti Guðmundsson kom fullur sjálfstrausts inn í stórsvigskeppnina, sem nýkrýndur Íslandsmeistari í svigi og alpatvíkeppni. 

Gauti átti besta tímann eftir fyrri ferð en Matthías Kristinsson úr Skíðafélagi Ólafsfjarðar var annar og Bjarni Þór Hauksson úr Víkingi þriðji. 

Jón Erik Sigurðsson bætti stöðu sína verulega í seinni ferðinni, náði þriðja besta tímanum og tryggði sér bronsverðlaun eftir að hafa verið í fimmta sæti eftir fyrri ferð.

Matthías fékk svo silfrið en Gauti Guðmundsson átti besta tímann og varð Íslandsmeistari í stórsvigi.

Gauti varð þar með þrefaldur íslandsmeistari árið 2026, eftir sigra í svigi, stórsvigi og alpatvíkeppni. Í alpatvíkeppni karla varð Matthías Kristinsson í öðru sæti og Jón Erik Sigurðsson í því þriðja.

Sonja best í fyrri og seinni ferð 

Sonja Lí Kristinsdóttir úr Skíðafélagi Akureyrar átti besta tímann eftir fyrri ferð í kvennaflokki. 

Nýkrýndur íslandsmeistari í svigi, Þórdís Helga Grétarsdóttir úr Víkingi, var með annan tímann og Eyrún Erla Gestsdóttir, einnig úr Víkingi, með þriðja besta tímann.

Í seinni ferð náði Elín Elmarsdóttir Van Pelt Víkingi besta tímanum, sem skilaði henni bronsinu eftir að hafa verið í fjórða sæti eftir fyrri ferð. 

Þórdís Helga tryggði sér svo silfrið en Sonja Lí Kristinsdóttir náði besta tímanum og stóð uppi sem Íslandsmeistari í stórsvigi.

Þórdís Helga vann tvöfalt 

Í svigi og alpatvíkeppni kvenna varð Þórdís Helga Grétarsdóttir Íslandsmeistari. Sonja Lí Kristinsdóttir varð önnur og Eyrún Erla Gestsdóttir þriðja. 

Þórdís varð þar með tvöfaldur íslandsmeistari árið 2026, í svigi og alpatvíkeppni.

Síðustu keppni alpagreina aflýst 

Síðasti dagur Skíðamóts Íslands í alpagreinum átti að fara fram í dag með keppni í samhliðasvigi. Vegna veðurs hefur þeirri keppni verið aflýst. 

Fréttin var uppfærð 10:59. 

Dagur og Kristrún Íslandsmeistarar í skíðagöngu

Í gær hófst skíðamót Íslands í skíðagöngu á Ólafsfirði. 

„Frábærar aðstæður voru á Ólafsfirði í dag, frost, sól, logn og nægur snjór. Keppt var með hefðbundinni aðferð og ræst út með hópstarti,“ segir í tilkynningu. 

Íslandsmeistari í karlaflokki varð Dagur Benediktsson frá Ísafirði, annar varð Einar Árni Gíslason frá Akureyri og þriðji Snorri Einarsson frá Ísafirði. Eyþór Árnason átti frábæran dag og varð fjórði í göngunni og þar með Íslandsmeistari í sínum aldursflokki 17-18 ára.

Í kvennaflokki varð Kristrún Guðnadóttir fyrst, María Kristín Ólafsfdóttir varð önnur og þriðja varð Vala Kristín Georgsdóttir. Allar eru þær úr Ulli. 

Í dag verður keppt með frjálsri aðferð og hefst keppni kl 11:00.