Sara ætlaði að vera í tíu daga en endaði á því að vera í þrjá mánuði

Sara sagði frá ævintýrum sínum í Arizona í færslu á samfélagsmiðlum sínum.

„Ferð sem átti bara að vera tíu dagar en endaði á að vera þrír mánuðir,“ skrifaði Sara í upphafi pistils síns.

Hún ákvað að taka enga áhættu með endurhæfinguna og sleppti því að taka þátt í undankeppni heimsleikanna í CrossFit. Hún verður því ekki með á heimsleikunum í ár en kemst vonandi aftur á keppnisgólfið seinna í vor.

Hætti við að fara til Dúbaí

„Ég átti að vera á leiðinni aftur til Dúbaí eftir jól á Íslandi en ég var í miklum erfiðleikum, hnéð á mér batnaði ekki og mér fannst ég vera föst bæði andlega og líkamlega,“ skrifaði Sara.

„Daginn fyrir flugið mitt var mælt með þjálfara fyrir mig og eftir símtal við hann ákváðum við Kyle með 24 klukkustunda fyrirvara að breyta áætlunum og fljúga til Arizona í staðinn,“ skrifaði Sara.

Hlutirnir fóru loksins að batna

„Eftir eina viku af þjálfun og endurlærdómi á hreyfimynstrum vissi ég að ég gæti ekki farið þegar hlutirnir voru loksins að batna. Þremur mánuðum síðar er ég að gera hluti sem ég hafði ekki getað gert í átta mánuði og ég tek framförum í hverri viku. Ferðalaginu er ekki lokið en erfiðasti hlutinn er að baki,“ skrifaði Sara.

„Hver hefði getað giskað á að þessi ferð yrði ein sú eftirminnilegasta,“ skrifaði Sara og kom með skemmtilega upptalingu á þessum fyrstu mánuðum á nýju ári á nýjum stað.

Upptalninguna má finna hér fyrir neðan en þar segir Sara að fólk hafi komið fram við hana eins og drottningu, hún hafi verið eins amerísk og hægt var og keyrt um á amerískum bíl. Hún passaði Benjamin Button hundaheimsins, öðru nafni Maximus, og varð ástfangin af kaktusum og merkingunni á bak við þá. Hún sá líka draumabílinn sinn, hvítan Ford pallbíl, og flaug í sólsetrinu.

„Þannig að takk allir í Arizona fyrir að gera þessa ferð svo magnaða, ég get ekki beðið eftir að koma aftur,“ skrifaði Sara eins og sést hér fyrir neðan. Þar má sjá bæði myndir og myndbönd frá þessum tíma hennar í einum heitasta hluta Bandaríkjanna.